Nowu wuchowansku stražu na zapadnej kromje Budyšina chcedźa 1. julija oficialnje přepodać. Přichodne dny tam Němski čerwjeny křiž swoje jězdźidła zaměstni. Wčera móžachu so nowinarjo po rumnosćach rozhladować.
Budyšin (CS/SN). Wuchowanska straža Budyšin-zapad wobsteji z dweju dźělow po 420 kwadratnych metrach. Stej to jězdźidłowa hala a socialny wobłuk, kotryž wopřijima předrasćernju, kubłansku rumnosć, myjernju, štyri rumnosće za wotpočowanje a běrowaj. Wuchowanska straža je wupołožena za cyłkownje 60 wuchowanskich sanitetarjow a lěkarjow. Do nowotwara je wokrjes 2,5 milionow eurow inwestował. Přez chorobne kasy jako nošerjow wuchowanskeje słužby so twar refinancuje.
