Mjeztym hižo wjacore lěta pospochi wuhotuja Budyski wokrjes, Pančičanska gmejna, klóšter Marijina hwězda a Křesćansko-socialny kubłanski skutk (CSB) njedźelu do swjedźenja swj. Jana Křćenika zhromadnje wulki klóšterski a swójbny swjedźeń.

Pančicy-Kukow (aha/SN). Swjedźeń za wšě generacije, kotryž steješe lětsa pod hesłom „Wotewr swoju wutrobu!“, zahajichu z Božej mšu w klóšterskej cyrkwi. Sotry konwenta a Kulowski młodźinski chór Effata ju wobrubichu. W cyrkwi dožiwichu lubowarjo hudźby wčera popołdnju tež pišćelowy koncert. Zakónčił je so swjedźeń z ekumeniskim nyšporom na klóšterskim dworje.