Symjenjowa bursa jako poradźeny zazběh do zahrodkarskeho lěta

Njebjelčicy (JK/SN). Hačrunjež su zahrodki a rostlinarnje hišće w zymskim sparje, so mnozy hižo nětko na nowe zahrodkarske lěto přihotuja. Něchtóžkuli nječini to sam, ale sej nazhonjenja a wosebje symjo za bohate žně a wuspěch w zahrodce z druhimi dźěli abo wuměnja. Třeći raz wotmě so njedźelu w Njebjelčicach symjenjowa bursa. Organizowana wot towarstwa Kamjenjak přiwabi wona znowa tójšto wuspěšnych plahowarjow kaž tež za nowosće zajimowanych hobbyjowych zahrodkarjow. Přewažnje symjo zeleniny, a to wosebje najwšelakorišich družin tomatow, zbudźi zajim wopytowarjow. Na šěsć stejnišćach prezentowachu zahrodkarjo-lajkojo symjo družin, kiž sami wuspěšnje plahuja a kotrež rady druhim k pospytanju přewostajeja. Wažna kajkosć symjenja je, zo z njeho wurosćace rostliny dobre wunoški a aromatiske płody přinjesu. Tajke maš pola tomatow we wšitkich předstajomnych barbach a formach.