Budyšin (SN/at). Sylny wětřik duješe 56 křižerjam Budyskeho procesiona mjezwoči, jako jutrowne město wopušćichu. Tónkróć bě jich sydom mjenje hač loni. Z jasnje zanjesenymi kěrlušemi po­dachu so woni do susodneje Radworskeje wosady. W procesionje wuhladachmy jednoho nowačka ze zelenym wěnčkom a třoch ze slěbornym. Zymne wjedro drje je mnohich ludźi wottrašiło křižerjow sej wobhladać. Najebać to bě tójšto pućowanskich skupin mjez druhim z Čěskeje, Heidelberga, Darmstadta abo Hillesheima do Budyšina přijěło, zo bychu tudyši 26. křižerski procesion dožiwili.
Kulow (aha/SN). Procesion z cyłkownje 393 jěcharjemi je Kulowski wosadny farar dr. Wolfgang Křesák na puć do Ralbic wužohnował. Z toho bě 176 pod kantorom Steffenom Kobalzom w němskim dźělu, mjez nimi šěsć slěbornych jubilarow a dwaj nowačkaj. Na čole 217 křižerjow sylneho serbskeho dźěla z kantorom Michałom Krječmarjom z Dubrjenka jěchachu Brěžčenjo. Tež w serbskim dźělu bě šěsć křižerjow ze slěbornym wěnčkom a runje telko ­ze zelenym. Tomaš Jorš a Frank Rajner Mark jěchaštaj 40. raz. Tež farar Gabriš Nawka bě mjez křižerjemi.