Z tutym rjadom přinoškow chcemy wam měsačnje poručić, što móžeće w zahrodce abo w rostlinarni zdokonjeć. Přejemy wam wjeselo při dźěle a radosć při wobkedźbowanju toho, štož pod wašimaj rukomaj rosće.
Kruta zyma a sněh stej so w januaru do Łužicy wróćiłoj, znajmjeńša na někotre dny. Budźmy wćipni, kajki so nam měsac februar pokaza. Wulke žně w zymnym času njewočakujemy. W swójskej zahrodce abo rostlinarni wšak njeje so ničo noweho přidružiło. Na dnjach bjez zmjerzka hodźa so nadal korjeninowa zelenina kaž pastyrnak, zatkańca a módra jutnička (Haferwurzel), łopjenowa zelenina kaž rjaponka (Feldsalat), zymska žerchej (Winterkresse) abo posteleinowa solotej abo k swójbje kobołkow słušacy zymski porej (Winterporree) žnjeć. Wšelake družiny kała, kaž pupkaty kał (Rosenkohl), zeleny kał abo palmowy kał – jeli hišće maće –, hodźi so wězo tež hišće dale žnjeć.
