Ministerski prezident Sakskeje na rozmołwje w redakciji Serbskich Nowin

Budyšin (SN/mb). Z přećelnym serbskim „Dobry dźeń“ je ministerski prezident Sakskeje Michael Kretschmer (CDU) wčera do redakcije našeho wječornika zastupił. Jeho přewodźeštaj knježerstwowy rěčnik Ralph Schreiber a wosobinski referent Alexander Szymanski. Najprjedy sej knježerstwowy šef ze zajimom wobhlada, kak layouterce Bettina Młynkowa a Kathrin Spiesec dźěłatej, doniž njeje so do sydarnje na rozmołwu z redakciju podał. Tam jemu jednaćel Ludoweho nakładnistwa Domowina (LND), Syman Pětr Cyž, produkciju a struktury LND předstaji. Kretschmer so za najwoblubowanišimi serbskimi knihami wobhoni, prjedy hač so jeho šefredaktor Marcel Brauman, redaktorka za hospodarstwo Bianca Šeferowa a wolontar Maximilian Gruber za aktualnymi temami prašachu.