Budyski staroměšćanski festiwal tež lětsa zaso wopytowarjow zahorił

Budyšin (CS/SN). Rjane wjedro pózdnjeho lěća, kulisa stareho města a njeličomne poskitki na staroměšćanskim festiwalu su kónc tydźenja wjele wopytowarjow do Budyšina nawabili. Dokładnu ličbu šef Budyskeho turistiskeho towarstwa Dietmar Stange hišće mjenować njemóže. „Telko wopytowarjow kaž loni smy na kóždy pad měli, potajkim znajmjeńša 25 000“, wón wuzběhnje. Najskerje přijomnych temperaturow dla, je sobotu najwjace ludźi přišło. Jara poćiło je so pjatk nimale 400 sobuskutkowacych, kotřiž su swoje stejnišća natwarili a zarjadowali. „Tola kóždy jednotliwy z nich je ­wšitko za to činił, zo je festiwal tež lětsa zaso jónkrótny swjedźeń był“, rozprawja Dietmar Stange. Za mnoho wopytowarjow, wosebje za staršu generaciju, běše prěni wjeršk festiwala předstajenje filma „Christina a baćony„ kaž tež wurězkow z agentoweho filmoweho klasikarja z časa NDR „Njewidźomny wizěr“. Gastronom Michael Pfützner běše tutej „filmiskej parličce“ organizował.