Kulturne towarstwo w Ćisku domchowanku woswjećiło

Ćisk (KD/SN). Mnozy wopytowarjo su sej tež lětsa při najrjeńšim słónčnym wjedrje na domchowanku do Ćiska dojěli. Tamnišej kulturne towarstwo a dobrowólna wohnjowa wobora su sobotu wopytowarjow ze słódnymi praženymi kołbaskami, plincami a tykancom pohosćili. Tež Rakečanscy dujerjo běchu přišli, zo bychu so hudźbnje wo dobru naladu postarali. Najmłódšich wopytowarjow pak je klankodźiwadło Wojerowskeje Kulturneje fabriki Kufolino ze swojim předstajenjom zakuzłało. Čłonojo keramiskeje skupiny kulturneho towarstwa mějachu samo zhotowjene pisane łopjena, kćenja a figury z hrónčkami za nazymu z pisaneje keramiki na poskitk. Nimo toho je Brigita Schmidtowa z Bukowa (Hohenbocka) na swojim krosnje publikumej stare rjemjesło tkanja předstajiła.