Wobstatk serbskich knihow a medijow w bibliotece Slepjanskeje gmejny w tamnišim Němsko-serbskim šulskim centrumje je wot wčerawšeho wo tójšto rozrostł.
Slepo (AK/SN). Iniciěrowała je tutu „serbsku knihowničku“ motiwatorka za serbsku rěč a zamołwita za region Slepo/Wochozy Juliana Kaulfürstowa w projekće ZARI – syće za serbšćinu a regionalnu identitu. Dźakowano financielnym srědkam z tutoho projekta je nětko 95 serbskich knihow z Budyskeje Smolerjec kniharnje w Slepom „swoju domiznu“ nadešło. Knihi z wobłukow literatura, přirodowěda, regionalne stawizny a kultura, powědki a bajki su runje tak mjez nimi kaž spěwniki, wučbnicy kaž tež dźěćace abo warjenske knihi. Nimo toho namakaš wězo knihi z literariskimi twórbami awtorow ze Slepjanskich kónčin w knihowničce. Ale tež nowe medije tu zajimowaneho čitarja wočakuja, mjez druhim BOOKii-knihi, CDje kaž tež DVDje.
