Na posedźenju gmejnskeje rady w Dźěwinje wo projektach informowali

Dźěwin (AK/SN). Na wčerawšim zeńdźenju gmejnskeje rady w Dźěwinje informowaše nawoda zarjada za planowanje, twarstwo a hórnistwo w zarjadniskim zwjazku Slepo Steffen Seidlich gmejnskich radźićelow wo stawje twarskich dźěłow na rozšěrjenskim twarje gratownje gmejnskeje wohnjoweje wobory w Brězowce. „Wšitko po planje běži. Wrota do hale za jězdźidła su zatwarjene, runje dźěłamy na wonkownym arealu. Tam smy přijězd asfaltowali. Přizamknjenje twara k medijam smy dokónčili“, wón znazorni. Wjetšinu nadawkow za twarske dźěła je gmejna lokalnym twarskim firmam ze zarjadniskeho zjednoćenstwa Slepo přepodać móhła. „Naš jasny zaměr je, zo twarski projekt lětsa dokónčimy“, podšmórny nawoda twarskeho zarjada. Na wonkownej fasadźe změje gratownja dwurěčne němsko-serbske wupisanje. Nimo toho chcedźa tam tež hesło wohnjowych wobornikow „Bohu k česći, blišemu na škit“ napisać.