Wojerowski klinikum so nad lěkarjemi z cyłeho swěta wjeseli

Budyšin (SN/VaŽ/mb). W Němskej dźěła 5 800 syriskich staćanow jako lěkarjo, přewažnje w chorownjach. Tohodla je Němska towaršnosć chorownjow na to skedźbniła, zo by jich nawrót do Syriskeje runje małe kliniki zwonka metropolow a mnohe chorownje we wuchodnej Němskej wužadował. W Sakskej dźěła wjace hač 400 syriskich lěkarjow, po lětušej statistice Sakskeje krajneje komory lěkarjow su syriscy kolegojo w swobodnym staće z 12,7 procentami podźěla najwjetša skupina medicinarjow z wukraja. Mjeztym ma wjele syriskich ćěkancow, kotřiž su wokoło lěta 2015 do Němskeje přišli, němske staćanstwo. Syriska towaršnosć za lěkarjow a haptykarjow trochuje, zo je w Němskej hač do 20 000 lěkarjow syriskeho pochada.