Kulowscy radźićeljo wyše popłatki za hort a pěstowarnju wobzamknyli

Kulow (AK/SN). Město Kulow zwyši wot klětušeho měsačne přinoški staršich za žłobik, pěstowarnju a hort. To je tamniša měšćanska rada wčera na swojim posedźenju jednohłósnje wobzamknyła. Za žłobik stupa popłatk wot 240 na 270 eurow. Za pěstowarnju dyrbja starši klětu 150 město dotalnych 140 eurow wob měsac płaćić. Za hort zwyši so měsačny popłatk wot 75 na 80 eurow. Město Kulow reaguje z tym na stajnje stupace ­kóšty za personal, material a energiju.