Gmejna Ralbicy-Róžant planuje kredity přerjadować

Róžant (JK/SN). Hladajo na wulku ličbu přidatnych wudawkow w zwisku z nowo­twarom Ralbičanskeje pěstowanje je gmejna Ralbicy-Róžant dźakowna za kóžde wolóženje gmejnskeje kasy. Tajku móžnosć skići mjez druhim poskitk bankow, přikrótšenje běžnych kreditow gmejny, abo lěpše kondicije za nje. Za dwaj kreditaj gmejny maja nětko tři poskitki, kotrež su po wuprajenju komornicy Franciski Čapikoweje dosć lukratiwne. Hladajo na to dyrbjachu gmejnscy radźićeljo na swojim posedźenju zašły tydźeń wo postu­powanju gmejny wotwažować: Pak wobaj kreditaj do jednoho zjednoćić a tutón wot meje z přijomnišej danju wotpłaćować, pak jedyn kredit hnydom zapłaćić a tamny wot februara z přijomnišej danju dale płaćić. Wobě warianće stej gmejnje dobra pomoc při financowanju dalšich projektow. Nanajpozdźišo hač do 28. januara ma so wona za poskitk rozsudźić.