Kulow (SN). Z princom Lukasom, jeho princesnu Isabel a dwórskim maršalom Andreasom swjeći Kulow jako jedyn z centrumow łužiskeho karnewala lětsa swoju 319. sezonu. Kaž měšćanske zarjadnistwo zdźěli, započnje so přećah žonow sobotu, 1. měrca, hižo w 13.30 hodź. Ćah powjedźe wot Bebeloweje po Wojerowskej, torhošću, Budyskej a Salowskej dróze dale po Hórnikowej, Haškowej a Kamjenskej wróćo na torhošćo. Tam skónči so ćah po druhim kole a po narěčomaj Towarstwa póstniskich žonow a princesny. Wulki póstniski ćah róžowu póndźelu započnje so tohorunja w 13.30 hodź. Po druhim kole porěčitaj měšćanosta a princ na torhošću. Z tym sej nory radnicu zdobudu.