Ze spěchowanjom na mnohich městnach barjery wotstronja

Budyšin (SN/MWj). Z wjace hač 313 000 eurami spěchuja so w Budyskim wokrjesu lětsa projekty, kotrež maja zadźěwki najwšelakorišeho razu wotstronić. Krajny rada Udo Witschas (CDU) je póndźelu wopisma wo přizwolenju spěchowanskich srědkow we wobłuku programa „Najlubše městna za wšitkich“ zastupjerjam 16 firmow, towarstwow, cyrkwinskich wosadow a komunow přepodał.

Z wotstronjenjom wobstejacych zadźěwkow ma so zbrašenym wolóžić, zjawne twarjenja a zarjadnišća wužiwać. Na te wašnje ma so jim zmóžnić, so na zjawnym žiwjenju w towaršnosći samo­zrozumliwje wobdźělić. Ze spěchowanskimi srědkami swobodneho stata Sakskeje hodźa so inwesticije zwoprawdźić, z kotrymiž so we wobłukach kultury, wólneho časa, kubłanja, gastronomije a strowotnistwa wobstejace zadźěwki wot­stronja. Štwórćina wšeje spěchowanskeje sumy je za to předwidźana, bjezbarjernosć w lěkarskich praksach zwoprawdźić.