Krótkopowěsće (11.12.17)
Lětsa wjac turistow
Budyšin. Ličba wopytowarjow sprjewineho města je lětsa znowa lochce přiběrała. To wozjewja město Budyšin. Wot spočatka lěta měješe Budyšin 57 656 hosći, štož su něhdźe 2,4 procenty wjac hač loni w samsnym času – a to, byrnjež město njeluboznych podawkow minjeneho lěta skerje w špatnym swětle stało. Zregistrowali su tohorunja 1,9 procentow wjac přenocowanjow w Budyšinje.
Sakska poslednja
Gütersloh. Sakska wobsadźi w studiji Bertelsmannoweje załožby „Socialna zwjazanosć w Němskej 2017“ poslednje městno. W telefoniskim naprašowanju bě so něhdźe 5 000 wobdźělnikow k temam, kaž dowěra k sobučłowjekam a institucijam, začuwanje sprawnosće a pomocliwosće wuprajiło. W Drježdźanach, Zhorjelcu a Budyšinje je socialna zwjazanosć hišće snadniša hač w krajnym přerězku.
Sćicha nakupować
Krótkopowěsće (08.12.17)
Dyrlich čestny čłon
Běłohród. Serbiski zwjazk spisowaćelow je serbskemu basnikej Benediktej Dyrlichej čestne čłonstwo w swojim zwjazku spožčił. Dyrlich wudźeržuje hižo mnohe lěta wuměłstwowe styki ze serbiskimi spisowaćelemi. Prawidłownje zetkawachu so serbiscy a łužiscy basnicy mjez druhim na Swjedźenju serbskeje poezije we Łužicy. Loni bě w Běłohrodźe dwurěčna zběrka Dyrlicha wušła.
Planuja ćichi protest
Zhorjelc. Dźěłarnistwo IG metal wuchodneje Sakskeje a zawodna rada Zhorjelskeje turbinoweje twornje chcetej 13. decembra ze swěčkowym rjećazom wokoło zawoda kaž tež z dohodownym spěwanjom 19. decembra před centralu Siemensa w Mnichowje a 21. decembra před zawodnymi wrotami w Zhorjelcu na ćiche wašnje za zachowanje wotnožki Siemensa nad Nysu protestować.
Třeći króć za sobu
Krótkopowěsće (07.12.17)
Cušcyna nowu knihu wudała
Lipsk. Pod hesłom „Tauschgut“ je w Lipšćanskim nakładnistwje Solomon-Presse wušła kniha z basnjemi a prozowymi tekstami Měrany Cušcyneje. Wosebitosć na 90 eksemplarow limitěrowaneho a signowaneho wudaća je originalny barbojty drjeworěz Karla-Georga Hirscha, bywšeho profesora Wysokeje šule za grafiku a knižne wuměłstwo w Lipsku a znateho ilustratora.
Za Minority SafePack wabił
Zhorjelc. Do wčerawšeho posedźenja Zhorjelskeho wokrjesneho sejmika je předsyda Domowiny Dawid Statnik w gremiju wobydlersku iniciatiwu FUEN Minority SafePack k skrućenju prawow mjeńšin na europskej runinje předstajił. Wón rozłoži radźićelam zaměry a wotpohlady iniciatiwy a přepoda jim podpismowe lisćiny. Přeprosył bě Statnika tamniši krajny rada Bernd Lange (CDU).
Pišćele imaterielne herbstwo
Krótkopowěsće (06.12.17)
Wopyt z informaciju
Zhorjelc. Sakska statna ministerka za wědomosć a wuměłstwo dr. Eva-Maria Stange (SPD) wopyta jutře Zhorjelsku synagogu, přichodny centrum Jacoba Böhmy a Šleski muzej. Sakska angažuje so za spěchowanje a wuwiwanje kulturnych institucijow w kulturnych rumach. Ministerka chce so tam wo aktualnym stawje kulturneho dźěła informować.
Najlěpši wellness-hotel
Borkowy. Hotel Blejcha Resort & Spa w Borkowach smě so wot nětka mjenować „Wellness Aphrodite“ němskorěčneho ruma. Nakładnistwo Landsberg je předewzaće sobotu w Europa parku Rust z tymle titlom wuznamjeniło. Wobkrućenje jury bazuje na tradicionalnym principje wuhotowanja Wabi-Sabi, kotrež tam hižo 20 lět wuspěšnje praktikuja.
Serbaj počesćenaj
Krótkopowěsće (05.12.17)
Přepytuja přećiwo Udej Wićazej
Budyšin. Zhorjelske statne rěčnistwo je wobkrućiło, zo přepytuje tuchwilu podhlada přerady słužbnych potajnstwow dla přećiwo Budyskemu zastupowacemu krajnemu radźe Udej Wićazej (CDU). Móžne pochłostanje njeje wuzamknjene. Nastork k tomu dało bě mjez druhim nowinarske rozprawnistwo w minjenych měsacach wo dowěrliwej komunikaciji Wićaza z bywšim wokrjesnym předsydu NPD Markom Wruckom.
Prěnju tačel wudali
Berlin. Tele dny je nowy Berlinski label takatak records, kotryž so hłownje elektroniskej hudźbje wěnuje, přenju tačel wudał. „artificial music 01“ je kompilacija tuchwilu w Greifswaldźe bydlaceho serbskeho wuměłca Mata Nawki, kotraž skići přehlad jeho tworjenja minjenych lět. Na sto eksemplarow limitěrowany winyl předawaja tež w Smolerjec kniharni.
Z wónju poprjancow
Krótkopowěsće (04.12.17)
Skutkowanje mytowane
Drježdźany. Prezident Sakskeho krajneho sejma dr. Matthias Rößler a sakska ministerka za socialne Barbara Klepsch (SPD) staj sobotu 55 čestnohamtsce skutkowacych ze swobodneho stata wuznamjeniłoj. Mjez nimi běchu wjacori z Hornjeje Łužicy. Charlottu Helas z Bóšic počesćichu za angažement w tamnišej starowni a za hajenje serbskich nałožkow. Hagena Austa z Łaza wuznamjenichu za skutkowanje při wuchowanju z wody.
Město rěčam přichilene
Lubin. Wokrjesne město Lubin wobdźěli so na braniborskim wubědźowanju „Rěčam přichilena komuna – serbska rěč je žiwa“. To je měšćanosta Lars Kolan (SPD) připowědźił. Lubin přisłuša serbskemu sydlenskemu rumej w Braniborskej. Lars Kolan tuž šule, towarstwa a iniciatiwy namołwja, wobdźělenje z idejemi a namjetami podpěrać. Prěni raz zetkać chcedźa so 18. decembra.
Twornja hišće pjeć lět wobsteji
Krótkopowěsće (01.12.17)
Nowa domjaca protyka wušła
Budyšin. Nakładnistwo Via Regia je wudało „Nowu hornjołužisku domjacu protyku 2018“. Publikacija nawjazuje na 25lětnu tradiciju knižneje protyki, kotruž bě serbski nakładnik dr. Frank Stübner w swojim nakładnistwje Lusatia wudawał. Po zwučenym wašnju wobsahuje publikacija najwšelakoriše přinoški tež serbskich awtorow mjez druhim wo kulturje a stawiznach Hornjeje Łužicy.
Na zjawny dialog so dojednałoj
Zhorjelc. Zjawnje wo přichodźe Zhorjelskeje twornje rěčeć, na to stej so koncern Siemens a dźěłarnistwo IG metal wuchodneje Sakskeje dojednałoj. Jeho prěni społnomócnjeny Jan Otto rěči „wo prěnim wuspěchu kedźbnosće, kiž móhli ze zhromadnje natwarjenym ćišćom docpěć“. Kajki móhł dialog konkretnje być, wo tym chcedźa so načolni zastupjerjo wobeju stron najprjedy dorozumić.
Wostanje dale šefdirigent
Krótkopowěsće (30.11.17)
Zaso něšto wjace bjezdźěłnych
Budyšin. We wuchodnej Sakskej je w nowembrje 19 420 bjezdźěłnych, 49 wjace hač w oktobrje a 2 092 mjenje hač před lětom. Předsyda jednaćelstwa Budyskeje agentury za dźěło Thomas Berndt mjenuje za to dwě přičinje. Sprěnja je w regionje třinaće procentow mjenje tak mjenowanych jednoeurowskich jobow. Zdruha su so prěni ludźo z wot wjedra wotwisnymi powołanjemi sezony dla bjezdźěłni přizjewili.
Na dźěłowej rozmołwje byłoj
Budyšin. Zapósłanc zwjazkoweho sejma Torsten Herbst (FDP) je předsydu Domowiny Dawida Statnika wčera wo tym informował, zo je w swojej frakciji nastorčił powołać zamołwiteho za serbske naležnosće. Na rozmołwje wobdźěli so dale předsyda Krabatoweho towarstwa Reiner Deutschmann. Rozjimali tež su, kak wučerjow serbšćiny zdobywać a wólbne podłožki dwurěčne wuhotować.
Nutřkownej měsće mytowanej
Krótkopowěsće (29.11.17)
Wotnožce agentury zawru
Kamjenica. Wot 1. januara 2018 dźěłowa agentura w Budyskim wokrjesu wotnožce w Biskopicach a Radebergu zawrje. Tak reaguje Zwjazkowa agentura za dźěło w Sakskej na woteběracu ličbu bjezdźěłnych. W Biskopicach bě w septembrje hišće 260 ludźi bjez dźěła registrowanych, w Radebergu 272. Wosobinsce wšak chce agentura klientam dale narěčenski partner wostać.
Wuknjenje rěče wolóžić
Choćebuz. Nowa kniha „Pó serbsku! – Gramatika za wuknjecych“ předleži. Wona zaběra so na lochke wašnje z delnjoserbskej gramatiku. Podate su husto wužiwane frazy, kotrež maja šulerjam přistup k delnjoserbšćinje wolóžić. Dale je kóždy tekst tež do němčiny přełoženy. Rěčny centrum WITAJ je knihu za delnjoserbšćinu wuknjacych wudał. Zwučowanski zešiwk k tomu ma klětu wuńć.
Chcedźa zaso Witaj-skupinu
Krótkopowěsće (28.11.17)
Prěni raz serbske myto
Podstupim. Braniborska chce klětu prěnje serbske myto za angažement wo zachowanje delnjoserbšćiny spožčić. Tole připowědźi społnomócnjena braniborskeho knježerstwa za serbske naležnosće Ulrike Gutheil. Tuchwilu pytaja hišće za mjenom. Wuznamjenić chcedźa z mytom předewšěm inowatiwne mysle nastupajo nałožowanje, posrědkowanje a wuwiwanje delnjoserbskeje rěče.
Drohe přerjadowanje
Drježdźany. Přerjadowanje wučerjow na zastojnikow by Saksku jeno za pensije 1,8 milionow eurow wob lěto płaćiło. Wjace hač 500 mio. eurow měł swobodny stat přichodne pjeć lět za wyše mzdy wudać, ručež 70 procentow tuchwilnych wučerjow hač do 46 lět za zastojnikow powołaja. Hač do lěta 2023 dyrbja z wjace hač 400 milionami eurow ličić, přistaja-li lětnje 1 500 wučerjow.
Wustajeńca hišće přistupna
