Krótkopowěsće (02.04.25)
Załožba spěchuje projekty a rěč
Budyšin. Za druhe połlěto je 40 próstwow wo spěchowanje projektow pola Załožby za serbski lud dóšło, wo kotrychž budźe fachowa přirada 20. meje wuradźować. Za nowe koło wubědźowanja „Rěč zwjazuje“ móža zajimcy hač do 16. meje na internetnej stronje załožby ideje a projekty zapodać. Wone maja na originelne a regionalnje skutkowne wašnje widźomnosći serbšćiny słužić.
Čitanje, pisanje a ličenje sylnić
Drježdźany. 189 sakskich šulow wobdźěli so na programje „Startchancen“. Zwjazk a Swobodny kraj Sakska inwestujetej do lěpšeje infrastruktury a wuhotowanja šulow. Z programom chcedźa pola šulerjow bazisowe kompetency w čitanju, pisanju a ličenju sylnić kaž tež zwisk mjez socialnym pochadom a kubłanskim wuspěchom přepytować.
Kónc partnerstwa za demokratiju
Krótkopowěsće (01.04.25)
Šulerjo přewjeduja projekty
Worklecy/ Budyšin. Serbska wyša šula „Michał Hórnik“ we Worklecach zarjaduje wot wčerawšeho hač do srjedy wosebite projektowe dny. Tak maja šulerki a šulerjo móžnosć, so w rozdźělnych projektach eksternych partnerow na wšelkich polach tak mjenowanych MINT-předmjetow wuspytać a z přirodowědnymi temami zaběrać. Tež Budyski serbski gymnazij tele dny projektne dny přewjeduje.
Přihoty wotzamknjene
Bad Schandau. Přihoty za přepruwowanje mosta nad Łobjom w Bad Schandauwje su wotzamknjene. Tři dny chcedźa tam fachowcy přepruwować, w kotrej měrje da so móst wužiwać. Z pomocu wosebiteho jězdźidła, kotrež hodźi so wot daloka wodźić a z přiběracymi wahami nakładować, chcedźa móst wobkedźbować, zdźěli dźensa sakske nutřkowne ministerstwo w Drježdźanach.
Płaćizny dale stupaja
Krótkopowěsće (31.03.25)
Přirodu sej wotkrywać
Drježdźany. Sakske ministerstwo za wobswět zarjaduje lětsa tak mjenowane wuchodźowanja po přirodźe. Wjace hač 300 turow po cyłym swobodnym staće skića zajimcam móžnosć, so bliže wo krajinje a přirodźe informować. 66 zarjadowanjow chcedźa w Hornjej Łužicy přewjesć. Dokładniše informacije nadeńdźeće w interneće pod: https://www.fruehlingsspaziergang.sachsen.de/
Znowa demonstraciju přewjedli
Budyšin. Něhdźe 180 ludźi je so zawčerawšim w Budyšinje na demonstraciji wobdźěliło, kotruž běchu prawicarscy ekstremisća přizjewili. Demonstracija je so na Žitnych wikach zahajiła, wottam ćehnjechu wobdźělnicy do Strowotneje studnje. Woni žadachu sej změnu azyloweje politiki kaž tež zawrjenje hranicow po cyłej Europje.
Tunlej zawru
Krótkopowěsće (28.03.25)
W Barće zběhanku swjećili
Bart. Składnostnje ponowjenja šulskeho kompleksa w Barće swjećachu wčera zběhanku. Bywše stejnišćo zakładneje šule wobšěrnje saněruja a wo dwě twarjeni rozšěrja. Tam nastawaja nimo rjadowniskich a fachowych rumnosćow tež moderne zarjadnistwo, jědźernja a šulska kuchnja. Ponowjenje płaći něhdźe 19 milionow eurow. Wšitke dźěła maja hač do spočatka 2026 wotzamknjene być.
Dale a mjenje sobustawow
Drježdźany. Dale a mjenje ludźi po cyłej Sakskej přisłuša ewangelskej abo katolskej cyrkwi. Ewangelska cyrkej je loni něhdźe 17 000 sobustawow zhubiła, w katolskej cyrkwi bě jich něhdźe 2 900 mjenje. To wozjewi dźensa powěsćernja dpa. Statistikarjo měnja, zo zaleži to na demografiskej změnje. Najwjac wěriwych je wysokeje staroby.
Harcke kritizuje Woidke
Krótkopowěsće (27.03.25)
Nowy koordinator w LaSuB
Budyšin. Wěteńčan Syman Pawlik budźe wot 1. apryla nowy koordinator za serbske naležnosće w Budyskej wotnožce Krajneho zarjada za šule a kubłanje LaSuB. W swojej nowej poziciji w Budyšinje budźe wón direktora Budyskeje wotnožki LaSuB strategisce kaž tež operatiwnje fachowje podpěrać. Nimo toho budźe na zjawnostnym dźěle zarjada sobu skutkować.
Nowaj zastupjerjej přirady
Drježdźany. Zastupjerjo parlamentariskeje přirady Załožby za serbski lud buchu wčera popołdnju w Drježdźanach wuzwoleni. Nowaj sakskaj zastupjerjej staj Marko Šiman za CDU a Doreen Schwietzer za AfD. Šimana zastupuje Elaine Jenčec a Timo Schreyer je zastupnik Schwietzer.
SPD z nowym předsydu
Budyšin. Na hłownej zhromadźiznje měšćanskeho zwjazka SPD w Budyšinje su zastupjerjo minjeny pjatk dr. Tobiasa Mayera-Uhma za noweho předsydu wuzwolili. Jeho zastupujetaj w přichodźe Sandra Matzke a Eckart Riechmann. Nowemu rozšěrjenemu předsydstwu, kotrež je na dźesać čłonow rozrostło, přisłuša mjez druhim zaso dr. Měrćin Krawc.
Bayerki podleželi
Krótkopowěsće (26.03.25)
Olympiada rěče zahajena
Wodowe Hendrichecy. Na swoju tradicionelnu centralnu olympiadu serbskeje rěče je Serbske šulske towarstwo tež lětsa zaso šulerki a šulerjow 6. lětnikow serbskich šulow přeprosyło. Hač do pjatka wubědźuja so dźěći wo prěnje městna. Wobšěrnu rozprawu čitaće w jutřišim čisle Serbskich Nowin.
Mortkow mjez kandidatami
Lipsk. Rozhłosowy sćelak MDR Jump chce lětsa zaso jutrowny woheń zarjadować. Wo městnosći maja připosłucharjo wothłosować. Mjez šěsć městami a wjeskami w Sakskej, Durinskej a Saksko-Anhaltskej je lětsa tež Mortkow pola Łaza, hdźež móhł so swjedźeń ćichu sobotu, 19. apryla, na twjerdźiznje wotměć. Na koncerće chcedźa mjez druhim spěwarja Maxa Giesingera witać.
SSW chce wjac prawow w sejmje
Krótkopowěsće (25.03.25)
Wjac ćahow do stolicy
Budyšin. Wot spočatka apryla pojědźe na kóncach tydźenja wjace ćahow z Budyšina směr Drježdźany. Sobotu zasadźa jedyn přidatny, njedźelu samo štyri dalše ćahi. Tak zaruča zaměrowy zwjazk ZVON, zo kóždu hodźinu spěšny ćah do Biskopic a wottam dale do Drježdźan jědźe. Jězba wšak budźe dróša, dokelž zwjazk VVO płaćizny jězdźenkow wot 1. apryla wo něhdźe 6,9 procentow powyši.
Ze Zhorjelca do Würzburga
Zhorjelc. Dr. Daniel Morgenroth, intendant Gerharta Hauptmannoweho dźiwadła Zhorjelc-Žitawa, so „z wosobinskich přičin“ po štyrjoch lětach z Łužicu rozžohnuje. Po wčera wozjewjenej zdźělence nastupi Morgenroth wot hrajneje doby 2026/2027 intendantstwo dźiwadła Mainfranken we Würzburgu. Wotpowědny rozsud bě tamniša měšćanska rada hižo minjeny štwórtk wobkrućiła.
LEAG w čěskich rukach
Krótkopowěsće (24.03.25)
Literarnu dźěłarničku přewjedłoj
Budyšin. Lubina a Dušan Hajduk-Veljkovićec staj znowa literarnu dźěłarničku w nošerstwje Załožby za serbski lud zarjadowałoj. Ćežišćo dźěłarnički w Budyskim Serbskim domje bě literarne přełožowanje. Pjeć zajimcow je so wobdźěliło. Woni běchu někotre wotrězki dźěćaceje knihi „Kuzłarska kula“ Steffena Gemmela z němčiny do hornjoserbšćiny přełožili. Na zakładźe rěčneje a stilistiskeje analyzy přełožki diskutowachu.
Dawidowski do Mišna
Chrósćicy. Drježdźansko-Mišnjanski biskop Heinrich Timmerevers je Chróšćansku wosadu z dekretom wo tym informował, zo zakónči farski wikar farar Tomaš Dawidowski k 1. aprylej swój nadawk we wosadźe a zdobom nowy nadawk přewozmje. Wón ma w přichodźe měšniske słužby we wosadźe swjateho Bena w Mišnje wukonjeć.
Najdlěšu tramwajku předstajili
Krótkopowěsće (21.03.25)
W Sakskej rady piwo warja
Berlin/ Drježdźany. Po cyłej Němskej je dźeń a mjenje piwarnjow, nawopak je tomu w Sakskej. Wot lěta 2019 do 2024 bu w zwjazkowym kraju dohromady sydom nowych piwarnjow wotewrjenych. Tole zdźěli Zwjazk piwarcow Němskeje, kiž so na nachwilne daty Zwjazkoweho zarjada za statistiku powołuje. Cyłkownje wobsteji w Sakskej 84 piwarnjow.
Po jězoru nětko tež z čołmom
Drježdźany/Bjerwałd. Sakska krajna direkcija je z powšitkownymaj wukazomaj trajne wužiwanje Bjerwałdskeho jězora za čołmy dowoliła. Wot 1. apryla móža jězor tuž wšitcy z čołmom wužiwać, wšojedne hač ma čołm motor abo nic. Z cyłkownej płoninu 13 kwadratnych kilometrow je něhdyša brunicowa jama najwjetši jězor Sakskeje.
„Šćežka Goetheho“ nastawa
Krótkopowěsće (20.03.25)
Wjac mzdy za přistajenych LEAG
Choćebuz. 7 200 sobudźěłaćerjow LEAG dóstanje w dwěmaj kročelomaj hač do klětušeho 1. februara zwyšenje mzdy wo 7,5 procentow. Čłonojo dźěłarnistwa IGBCE, kotrež je wuslědk w jednanjach z koncernom přesadźiło, móža so přidatnje nad 1 000 eurami wjeselić. Dale smědźa rozsudźić, hač chcedźa klětu přidatnej płaćenej wólnej dnjej abo 500 eurow přiražki wot dźěłodawarja přijimać.
Nowa ideja za wobchad na A4
Budyšin/Zhorjelc. Měšćanosća a wjesnjanosća Hornjeje Łužicy su sej stajny zakaz přesćahowanja za šoferow nakładnych awtow na awtodróze A4 mjez Drježdźanami a Zhorjelcami žadali. Sakski zwjazk městow a gmejnow we wokrjesomaj Budyšin a Zhorjelc je žadanje w lisće krajnej direkciji Sakskeje sposrědkował. Tajki zakaz by prěnja a realistiska kročel přećiwo přećeženju awtodróhi była.
Namołwa knježerstwu
