Policija (05.03.18)
Rozbuchnjenje zwrěšćiło
Njedźichow. Krótko po 4 hodź. chcychu njeznaći sobotu rano pjenježny awtomat w Njedźichowskej wotnožce lutowarnje rozbuchnyć. Za to woni płun do awtomata wjedźechu. Jako pak chcychu jón zapalić, zo by rozbuchnył, so ničo dale njesta, tak zo skućićeljo pjenježne kasety do ruki njedóstachu. Policija je hakle dwaceći mjeńšin pozdźišo wo planowanym njeskutku zhoniła. Njeznaći běchu w tym času dawno hižo twochnyli.
Policija (02.03.18)
Přemało widźeli
Rakecy. Hladajo na tuchwilne zmjerzki policisća zawčerawšim w Rakecach kontrolowachu, hač su šoferojo wokna swojeho awta porjadnje wuškrabali. Třo potrjecheni to činili njeběchu. Za to dyrbjachu woni po dźesać eurach zapłaćić. Prjedy hač smědźachu dale jěć, dyrbjachu wokna porjadnje wuškrabać.
Policija (01.03.18)
Pozdatneho paducha lepili
Wojerecy. Z přikazom zajeća pytaneho muža su policisća zawčerawšim popołdnju při wobchadnej kontroli we Wojerecach lepili. 31lětneho wodźerja wosoboweho awta typa Volvo běchu na Łučanskej dróze zadźerželi. Jako sej jeho personalije bliže wobhladachu a je z přehla- dom w kompjuteru přirunachu, zastojnicy zwěsćichu, zo justica za mužom pyta, dokelž je podhladny ćežkeho padustwa w cwólbje. Muža na to hnydom zajachu a jemu njewočakowanu nowosć zdźělichu.
Policija (28.02.18)
Wowka poslednja pomoc była
Běła Woda. Dokelž 31lětny muž w Běłej Wodźe pokutu 70 eurow zapłaćił njebě, policija za nim pytaše. Jako wón zawčerawšim pjenjezy přeco hišće njeměješe, chcychu jeho policisća do jastwa dowjezć. W poslednim wokomiku je wowka muža pokutu zapłaćiła.
Policija (27.02.18)
Zličbowanku njezapłaćili
Běła Woda. Swoju jězbu z taksijom nochcychu třo młodostni w nocy na njedźelu w Běłej Wodźe zapłaćić. 17lětny a jeho 16lětnaj přewodźerjej dachu so z Grodka na Zhorjelsku dróhu dowjezć. Jako mějachu za to 56 eurow zapłaćić, woni nadobo z awta wuskočichu a ćeknychu. Přiwołanej policiji pak so poradźi jich mjena zwěsćić, tak zo změja so wšitcy třo nětko za swój delikt zamołwić.
Policija (26.02.18)
Pod a z drogami, ale bjez papjerow
Běła Woda. Hnydom wjacore delikty su zastojnicy zwěsćili, jako kontrolowachu minjeny pjatk wječor w Běłej Wodźe wosobowe awto typa Audi. Dokelž so 35lětny wodźer napadnje zadźerža, nasta podhlad, zo móhł wón pod wliwom drogow stać. A podhlad so při tesće jako prawy wopokaza. Nimo toho namakachu pola muža wjacore titki z kristalinym próškom. A skónčnje policisća při dalšim přepruwowanju 35lětneho zwěsćichu, zo tón scyła žanu jězbnu dowolnosć njeměješe, dokelž běchu ju jemu hižo sćazali. K deliktej jězdźenja pod drogami přińdźetej tuž hišće wobsydstwo wopojnych srědkow a jězdźenje bjez jězbneje dowolnosće. Tež wobsedźerka awta změje so zamołwić, zo bě mužej awto přewostajiła, byrnjež wón dowolnosć njewobsedźał.
Policija (23.02.18)
Zawinowar njezboža wuslědźeny
Budyšin. Na mnohe pokiwy swědkow je policija zawinowarja njezboža z ćežko zranjenej wosobu při Budyskej Röhrscheidtowej kupjeli zašły pjatk nětko wuslědźiła. Jako zastojnicy wčera 82lětneho šofera VWja w Hornim kraju wopytachu, bě wuměnkar widźomnje wolóženy, zo su jeho namakali. Wón swoje přeńdźenje hnydom přizna, policija zdźěli. Na awće rentnarja zawěsćichu slědy, jězbnu dowolnosć jemu sćazachu. Nětko so statne rěčnistwo z padom zaběra. Dźens tydźenja bě tehdy njeznaty blisko Röhrscheidtoweje kupjele do 77lětneje pěški zrazył a ćeknył, bjez toho zo by so wo zranjenu starał. Staw ćežkozranjeneje je dale kritiski. Kaž policija informuje, lěkarjo dale wo jeje žiwjenje wojuja.
Policija (22.02.18)
Pytaneju paduchow zajeli
Kamjenc. Policija móžeše tele dny w Kamjencu dweju paduchow na městnje njeskutka zajeć. Mužej w starobje 37 a 46 lět běštaj so wutoru krótko po połnocy na ležownosć firmy na přemysłowej přestrjeni při Wolacej hórce w Bambruchu zadobyłoj. Tam chcyštaj po wšěm zdaću kolesa a dźěle awtow spakosćić. Kedźbliwy wobydler pak zawoła policiju. Jako paduchaj policajske awto pytnyštaj, spytaštaj ze swojim awtom ćeknyć. Zastojnicy pak jeju njedaloko městna njeskutka zadźeržachu a zajachu. Při kontroli personalijow zwěsćichu, zo běchu skućićelow hižo dalšich padustwow dla pytali. W awće namakachu rubiznu, kotruž móžachu njeskutkej w Hessenskej přirjadować.
Simson pokradnyli
Mužakow. Mopedy marki Simson z NDRskeje produkcije w Suhlu su chětro požadane, a to, kaž wupada, tež mjez paduchami. Hakle njedawno běchu njeznaći tajki w Mužakowje na Jabłońskej dróze pokradnyli. Kaž policija dźensa zdźěli, su paduši jeničce prědnje koleso mopeda ze zamkom stejo wostajili, wšo dalše pak sobu wzali. Policija nětko přepytuje.
Policija (21.02.18)
Dźiwje swinjo přejěł
Hola. W Holi pola Běłeho Chołmca je wčera rano wodźer małobusa do dźiwjeho swinjeća zajěł. Wo mortwe zwěrjo staraše so na to hajnik. Wěcna škoda wučinja něhdźe 5 000 eurow.
Jeep pokradnyli
Běła Woda. Na Grünowej w Běłej Wodźe wotstajeny běły jeep su njeznaći wčera w nocy pokradnyli. Něhdźe pjeć lět stary Cherokee ma hódnotu 40 000 eurow. Za jězdźidłom nětko „soko Kfz“ mjezynarodnje slědźi.
Płót wobškodźił a dale jěł
Čorny Chołmc. Hakle wčera policija zhoni, zo je zašłe dny něchtó na Dwórnišćowej w Čornym Chołmcu z awtom do groćaneho płota zajěł. Město toho zo by wobsedźerja ležownosće informował a so za škodu prašał, šofer ćekny.
Policija (20.02.18)
Drohe foto a dwaj dypkaj
Brětnja. Tam, hdźež je w Brětni/Michałkach na Drježdźanskej dróze spěšnosć 50 km/h dowolena, běštaj dwaj wodźerjej awta chětro razantnje po puću. 42lětny šofer Škody dóstanje za spěšnosć 108 km/h wosebje drohe foto. Wón smě nětko dwaj měsacaj nóžkować a dyrbi nimo toho 280 eurow pokuty płaćić. Dalši, 41lětny bě ze swojim Volvom 74 km/h přespěšny, štož wučinja dypk w Flensburgu a 80 eurow pokuty.
