Policija (08.09.17)
Dobroćiwosć žony znjewužiwał
Wojerecy. Kaž policija hakle nětko zhoni, je njeznaty minjenu sobotu dobroćiwosć 84lětneje žony we Wojerecach znjewužiwał. Wón bě pola rentnarki klinkał a ju wo pomoc prosył. Žona pušći jeho do bydlenja a krótki wokomik njekedźbowaše. W tym času hrabny sej cuzy z dweju móšnjow dwucyfrowu sumu pjenjez a twochny.
Policija (07.09.17)
Radšo kradnyć šli hač do šule
Budyšin. Mjeztym zo druzy w šuli sedźa a wuknu, su třo młodostni w Budyšinje zawčerawšim dopołdnja kradnyć šli. Swědk lepi padušnu trójku w starobje 14 do 17 lět, jako woni z podlěšenskim kablom a z grilowanskim wuhlom přez płót zahrodnišća při Nowoměšćanskej dróze zalězechu. Muž zawoła policiju, kotraž młodostnych w bliskosći dosahny. Po tym zo běchu zastojnicy jich personalije zwěsćili, přepodachu hólcow staršim. Kotre konsekwency to doma měješe, bohužel znate njeje. Policija pad dale přepytuje.
Policija (06.09.17)
Pjenjezy namakała a wotedała
Słona Boršć. To drje je sej najskerje kóždy hižo raz přał, njejapcy wulku sumu pjenjez namakać. Što pak z njej činiš? A što je z tym, kiž je pjenjezy zhubił? To je so zawěsće tež sprawna sobudźěłaćerka awtodróhoweho wotpočnišća Hornja Łužica-sewjer zawčerawšim wječor prašała. Wona informowaše policiju wo tym, zo je kabat z wupokazami a 2 000 eurami namakała. Zastojnicy awtodróhoweho policajskeho rewěra dokumenty přepruwowachu a wobsedźerja wuslědźichu. Muž bě wulce zbožowny a so wjeseleše, zo je žona tak sprawna była. Swoje wobsydstwo smě sej nětko na policajskim rewěrje wotewzać.
Policija (05.09.17)
Motorske do busa zrazyło
Kamjenc. Na Połčničanskej dróze w Kamjencu je wčera wječor k wobchadnemu njezbožu mjez busom a motorskim dóšło. Hdźež dróha na Böhnischowym naměsće nahle naprawo wotboča, zajědźe motorski na lěwy bok jězdnje a zrazy frontalnje do napřećo přijěduceho busa. Dwě wuchowanskej awće a nuzowy lěkar so wo zranjeneho wodźerja motorskeho starachu. Na městnje njezboža je jenož 30 km/h dowolenych. Połčničanska dróha je jedna z wažnych hasow Lessingoweho města z tójšto wobchadom.
Policija (04.09.17)
Po ćežkej zražce zemrěła
Rakecy. Při ćežkim wobchadnym njezbožu na zwjazkowej dróze B 96 je 52lětna wodźerka Opela wčera dopołdnja na kromje Rakec žiwjenje přisadźiła. Z Kamjeneje přijěducy bě žona ze swojim awtom z dotal njeznateje přičiny na prawy bok dróhi a tam frontalnje do štoma zajěła.
Policija (01.09.17)
Wupite piwo njezapłaćił
Wojerecy. Na cyle klewerne wašnje chcyše tele dny muž we Wojerecach blešku piwa darmotnje wupić, njebě pak z kedźbliwosću swědka ličił. W kupnicy na Lipjecskim naměsće je sej muž blešku wočinił a ju hnydom mjez polcami wupił. Tole pak swědk wobkedźbowaše. Jako chcyše lačny nimo kasy hić, bjez toho zo by zapłaćił, informowaše swědk policiju. 57-lětny změje so padustwa dla zamołwić.
Připowěšak so zwróćił
Hruboćicy. Traktor z připowěšakomaj je w Hruboćicach (Grubditz) w Kubšiskej gmejnje znjezbožił. Jako 61lětny traktorist z pólneho puća na hłownu dróhu wotboči, so zadni připowěšak zwróći. Při tym bu telefonowy sćežor wobškodźeny.
Policija (31.08.17)
Na kolesu telefonował
Kamjenc. Z kolesom jěć a při tym z handyjom telefonować njeje jenož zakazane, ale tež strašne. To dyrbješe zawčerawšim 13lětny hólčec w Kamjencu nazhonić. Telefonujo jědźeše wón po Goethowej. Najskerje bě tak do telefonata zanurjeny, zo wón wočinjene durje wosoboweho awta před sobu njepytny. Tak do nich zrazy a padny. Na zbožo so kolesowar njezrani. Na awće pak nasta něhdźe 350 eurow škody.
Policija (30.08.17)
Drohe koleso pokradnyli
Łaz. Triatlonowe wubědźowanje sobotu při Třižonjanskim jězoru pola Łaza su paduši za njeskutk znjewužiwali. Woni pokradnychu tam blisko jězora běłe koleso typa Trek Speed Concert. 48lětny wobsedźer trochuje hódnotu swojeho jězdźidła na něhdźe 4 500 eurow. Policija nětko za napadnym wubědźowanskim kolesom pyta.
Policija (29.08.17)
Při wotbóčce prasnyło
Słona Boršć. Při wotbóčce awtodróhi A 4 w Słonej Boršći je so wčera rano ćežke wobchadne njezbožo stało. Krótko po 7 hodź. je wodźer Seata napřećo přijěducy Pickup přewidźał a frontalnje do njeho zrazył. Na to zajědźe Pickup hišće do Lkw-ja, kotryž chcyše awtodróhu runje wopušćić. Wodźerjej wosoboweju awtow so ćežko zraništaj, tak zo dyrbjachu jeju do chorownje dowjezć. Nimo wjacorych wuchowanskich jězdźidłow běchu tež wohnjowe wobory zasadźene. Wobornicy starachu so wo wuběžane ćěriwo a su zhromadnje z policiju statnu dróhu S 106 zaraćili. Na wobdźělenych jězdźidłach nasta něhdźe 30 000 eurow škody.
Pod wliwom alkohola jěła
Smjerdźaca. Při kontroli Audija zawčerawšim wječor w Smjerdźacej je policiji „chorhojčka“ 64lětneje wodźerki napadnyła. Při tesće so wukopa, zo měješe žona 0,92 promilow alkohola w kreji. Na to jej dalšu jězbu zakazachu. Wona změje nětko 500 eurow pokuty płaćić, dyrbi měsac nóžkować a dóstanje nimo toho dwaj dypkaj w Flensburgu.
Policija (28.08.17)
Wandalojo zachadźeli
Budyšin. We wčerawšich rańšich hodźinach je skupina młodostnych na Budyskej Liebknechtowej pjeć awtow wobškodźiła. Swědka wobkedźbowaše, kak woni wot jězdźidłow typa Mercedes, Audi, Mitsubishi, Opel a Seat wonkowne špihele wotbichu. Škoda wučinja 2 000 eurow.
