Policija (06.12.22)
Padustwu zadźěwał
Budyšin. Kedźbliwy wobydler je předwčerawšim w Budyšinje po wšěm zdaću padustwu zadźěwał. Na Wobkruhu Strowotneje studnje 47lětny popołdnju wobkedźbowaše, kak so muž do kupnicy zadobyć spyta. Jako jeho narěča, wućahny skućićel popjerjowy spray, pryskaše Budyšanej mjezwoči a jeho snadnje zrani. Na to so cuzy zhubi. Pokradnył wón wočiwidnje ničo njebě.
Policija (05.12.22)
Frontalnje do so zrazyłoj
Niska. Ćežke wobchadne njezbožo stało je so wčera popołdnju na zwjazkowej dróze B 115 mjez Kodersdorfom a Niskej. Byrnjež kurjawojte było chcyše 59lětny wodźer wosoboweho awta hnydom štyri před nim jěduce jězdźidła přesćahnyć. Při tym wón frontalnje do napřećo přijěduceho awta zrazy. Jeho 24lětna wodźerka kaž tež zawinowar so ćežko zraništaj. Dróha bě štyri hodźiny zawrjena.
Policija (02.12.22)
Adwentnu hwězdu pokradnyli
Wojerecy. Wo nowu dohodownu dekoraciju budźe so wobydler we Wojerecach starać dyrbjeć. Na jeho ležownosći w južnym dźělu města blisko Globusa su njeznaći w nocy na srjedu Ochranowsku hwězdu při carporće pokradnyli a tež hnydom kabl sobu wzali. Cyłkownu škodu trochuja na 100 eurow.
Policija (01.12.22)
Při telefonje wobšudźili
Budyšin. 64lětny muž z Budyskeho wokrjesa je so předwčerawšim z woporom wobšudnikow stał a swoje nalutowanki zhubił. Při telefonje so žona jako statna rěčnica wudawaše a jemu napowěda, zo bě dźowka wobchadne njezbožo zawiniła, při kotrymž je jedna wosoba žiwjenje přisadźiła. Zo njeby do jastwa trjebała, by muž 150 000 eurow zapłaćić dyrbjał. Dokelž wón telko pjenjez njeměješe, poskići wón swoju zběrku złotakow, kotruž pozdźišo njeznatej wosobje přepoda. Złotaki běchu wjacore dźesać tysac eurow hódne. Policija w tym zwisku wospjet warnuje, zo sej statne rěčnistwo abo policija sama telefonisce a při durjach ženje pjenjezy nježadatej.
Policija (30.11.22)
Nakupowane twory pokradnyli
Wojerecy. Ani twory wšědneje potrjeby před paduchami wěste njejsu. Tole dyrbješe rentnar předwčerawšim dopołdnja we Wojerecach nazhonić. Nawróćiwši so z kupnicy chcyše 85lětny jeno swoje koleso do pincy donjesć a swój wačok z kupjenymi tworami za tón čas před durjemi wotstaji. Jako so wón z pincy nawróći, bě wačok fuk. Kaž policija zdźěli, bě wuměnkar za něhdźe 20 eurow nakupował.
Policija (29.11.22)
Młodostneho wurubili
Bart. Po swjedźenju w Bartskej sportowni bu w nocy na njedźelu młodostny wurubjeny. Kaž policija zdźěli, bě jeho něchtó wokoło 2 hodź. wotzady z kolesa storčił. 16lětny skrótka wědomje zhubi. Jako zaso k sebi přińdźe, pobrachowachu jemu cholowy, pulower, nawoči, běłe koleso a ćmowa móšnja. Nětko pyta policija swědkow, kotřiž su w nocy na njedźelu w Barće něšto wobkedźbowali.
Policija (28.11.22)
Po njezbožu do jastwa
Budyšin. Z tym drje pólski wodźer wosoboweho awta typa Ford předwčerawšim rano ličił njeje, zo budźe wječor samsneho dnja w jastwje. Na awtodróze A 4 blisko wotbóčki Budyšin-wuchod bě wón sobotu popołdnju prědnje lěwe koleso swojeho jězdźidła zhubił a na kromje jězdnje stejo wostał. Přez koleso zajědźe za nim jěduce awto, kotrež so při tym wobškodźi. Při wobdźěłanju njezboža policisća zwěsćichu, zo 29lětny zawinowar scyła žanu jězbnu dowolnosć njewobsedźeše. Nimo toho jeho justica z přikazom zajeća pytaše. Policisća zahajichu tuž jednanje jězdźenja bjez jězbneje dowolnosće dla a dowjezechu pólskeho staćana na to do Budyskeho jastwa.
Policija (25.11.22)
Do awta so zadobyli
Kamjenc. Row swojich přiwuznych je předwčerawšim popołdnju žona na pohrjebnišću při Kinsporskej dróze w Kamjencu wopytała. W tym času zadobychu so njeznaći do jeje wosoboweho awta typa Peugeot a pokradnychu ručnu tobołku. W njej bě nimale 600 eurow. Nimo toho načinichu paduši něhdźe 500 eurow wěcneje škody.
Policija (24.11.22)
Po hašenju drogi namakali
Bjedrichecy. Z dotal njeznateje přičiny je předwčerawšim w jednoswójbnym domje w Bjedrichecach pola Łaza woheń wudyrił. Wobornicy z Wojerec, Łaza, Šćeńcy, Hermanec a Koblic płomjenja podusychu. Wobydlerka bě dom hižo do toho wopušćiła. Po hašenju so wobornicy po domje bliže rozhladowachu a namakachu na hornim poschodźe dwě konopjowej rostlinje, kotrejž běštej k sušenju powěsnjenej. Nětko so z tymle padom policija zaběra.
Policija (23.11.22)
W bróžni kradnyli
Ćemjercy. Mała wjes Ćemjercy pola Budyšina so w policajskich rozprawach lědma raz jewi. Nětko pak su tež tam paduši pobyli. Woni zadobychu so minjene dny do bróžnje, z kotrejež pokradnychu wuhotowanje za krosnowanje kaž tež wšelki grat. Po informacijach policije wučinja škoda něhdźe 2 700 eurow.
Znjezboženej žonje pomhali
Běła Woda. Jako pomocnicy w nuzy wopokazachu so policisća a wohnjowi wobornicy předwčerawšim připołdnju w Běłej Wodźe. Na Brechtowej bě starša žona w swojim bydlenju padnyła a sej sama hižo pomhać njemóžeše. Na zbožo móžeše wona nuzowe čisło wolić. Wobornicy wočinichu bydlenje a policisća přepodachu žonu wuchowanskej słužbje.
