Policija (13.12.23)
Zakazane praskotaki zwěsćili
Mužakow. W Hornjej Łužicy so něchtóžkuli hižo nětko na silwesterske praskotanje přihotuje. Při hraničnym přechodźe do Pólskeje zwěsćichu policisća minjene dny nimale tysac praskotakow, za kotrychž jich wobsedźerjo žanu dowolnosć abo hišće prawu starobu njemějachu. Za někotre praskotaki dyrbiš znajmjeńša 21 lět być, za pyrotechniku kategorije 3 trjebaš wosebitu dowolnosć.
Policija (12.12.23)
Hwězdu z cyrkwje pokradnyli
Kotecy. Hodowna pycha bě w nocy na druhu adwentnu njedźelu cil njeznatych w Kotecach (Kotitz) pola Wósporka. Tam zadobychu so woni do wjesneje cyrkwje. Z njeje pokradnychu wulku Ochranowsku hwězdu. Při tym načinichu něhdźe tysac eurow wěcneje škody. Hwězda sama bě něhdźe 200 eurow hódna. Policisća namakachu w cyrkwi slědy, kotrež zawěsćichu.
Policija (11.12.23)
Lift tčacy wostał
Wojerecy. Na nic runjewon najrjeńšim městnje dyrbješe pjatk wječor 38lětny muž dlěši čas wutrać. W jednym z bydlenskich domow na Budyskej aleji we Wojerecach wužiwaše wón krótko po 18 hodź. lift, kiž nadobo mjez štwórtym a sedmym poschodom tčacy wosta a so hižo njehibaše. Regionalna dispatchernja wuchodneje Sakskeje koordinowaše trěbnu pomoc a pósła technikarja na městno. Jemu so poradźi lift reparować, tak zo móžeše 38lětny swoje jastwo po dwěmaj hodźinomaj njezranjeny zaso wopušćić.
Wopity z awtom jěł
Njedźichow. Při wobchadnej kontroli w Njedźichowje su policisća sobotu připołdnju 38lětneho šofera Škody zadźerželi. Pola njeho naměrichu 1,38 promilow alkohola w kreji.
Policija (08.12.23)
Zasudźeneho hnydom zaso lepili
Budyšin. Tak spěšnje drje hišće nichtó sudniski wusud ignorował njeje. 49lětny bu srjedu wopiwstwa w nadróžnym wobchadźe dla k dźewjeć měsacam bjez jězbneje dowolnosće zasudźeny. Jenož krótki čas pozdźišo lepichu jeho policisća, jako wón ze swojim Volvom po Stieberowej jědźeše. Při kontroli zwěsćichu, zo měješe muž 2,38 promilow alkohola w kreji. Kluč awta policisća sćazachu.
Policija (07.12.23)
Na hładkej dróze znjezbožiła
Njebjelčicy. W nocy na srjedu je so při wobchadnym njezbožu na Protečanskej dróze blisko Njebjelčic 20lětna žona ćežko zraniła. Ze swojim Peugeotom bě wona krótko do 1 hodź. wot Hlinowca do Njebjelčic po puću. Najskerje zalodźeneje dróhi dla kontrolu nad awtom zhubi a do přirowa zajědźe. Wohnjowi wobornicy žonu z jězdźidła wuswobodźichu. Wuchowanske mocy ju do chorownje dowjezechu.
Policija (06.12.23)
Rentnarce móšnju kradnył
Biskopicy. Hižo před dwěmaj tydźenjomaj su 69lětnej žonje w Biskopicach z toboły móšnju pokradnyli. Kaž policija hakle nětko rozprawja, bě rentnarka 23. nowembra w kupnicy na Hasy Carla Marije von Weber. Po wšěm zdaću je skućićel tobołu žony rozrězał a sej móšnju wzał. Hišće samsny dźeń wón štyricyfrowu sumu pjenjez z konta wuměnkarki wotzběhny. Kriminalna słužba Budyskeho policajskeho rewěra so z tymle padom zaběra. Nětko pytaja swědkow, kotřiž su mjenowany dźeń něšto podhladneho wobkedźbowali. Pokiwy přijimuja pod telefonowym čisłom 03591 3560.
Policija (04.12.23)
Whisky pokradnyli
Budyšin. Lubowarjo whiskyja pobychu sobotu připołdnju w kupnicy na Nowosólskej w Budyšinje. Tam pokradnychu dźesać blešow tohole palenca. Škoda wučinja něhdźe 200 eurow.
Policija (01.12.23)
Rentnarku wobšudźili
Arnsdorf. Z tak mjenowanym šokowym telefonatom su njeznaći wutoru staršej žonje w Arnsdorfje pjenjezy a debjenki wulišćili. Wudawajo, zo je wnučka při njezbožu dźěći moriła, žadaše sej pozdatna policistka 30 000 eurow kawcije. Telko pjenjez rentnarka spočatnje njeměješe. Pozdźišo přepoda wona snadnu pjećcyfrowu sumu pjenjez a štyri złoćane rjećazki. Hakle nazajtra při rozmołwje wona pytny, zo běchu ju njeznaći wobšudźili.
Policija (29.11.23)
Muža do jastwa dowjezli
Kamjenc. Komisar připad je póndźelu policistam w Kamjencu pomhał, wuslědźić muža, za kotrymž hižo dlěje pytachu. Na Halštrowskej dróze podpěrachu woni běrca (Gerichtsvollzieher) při jeho dźěle. Při tym zetkachu 48lětneho, kiž bě w bydlenju na wopyće. Přećiwo njemu předležeše přikaz zajeća. Zastojnicy dowjezechu muža tuž do jastwa, hdźež ma něhdźe pjeć měsacow wostać.
Policija (28.11.23)
Paduši w gratowni
Budyšin. Gratownju dobrowólneje wohnjoweje wobory w jednym z Budyskich měšćanskich dźělow su sej njeznaći w nocy na njedźelu jako cil wupytali. Po tym zo běchu so do jězdźidłoweje hale zadobyli, pokradnychu z jednoho Lkw-ja hydrawliski dźěłowy grat wobornikow w hódnoće něhdźe 5 000 eurow. Nimo toho nasta 2 000 eurow wěcneje škody.
