Policija (17.06.22)
Hólc so ćežko zranił
Łupoj. Jědnaćelětny hólc bu předwčerawšim wječor při wobchadnym njezbožu we Łupoji pola Radworja ćežko zranjeny. Po informacijach Zhorjelskeje policajskeje direkcije bě wón njejapce z ležownosće na puć běžał. 60lětny wodźer Škody njemóžeše hižo spinać a do hólca zajědźe. Dźěćo dowjezechu do chorownje.
Policija (16.06.22)
Wopiteju lepili
Chrjebja/Hamor. Policisća z Běłeje Wody su předwčerawšim dweju šoferow lepili, kotrajž běštaj hłuboko do piwoweje škleńcy hladałoj. W Chrjebi sedźeše dopołdnja 65lětny muž za wodźidłom Škody. Pola njeho naměrichu 2,06 promilow alkohola w kreji. Z kontrolu reagowachu zastojnicy na pokiw swědka. Wječor zadźeržachu w Hamoru 56lětneho wodźerja Citroëna. Wón měješe 2,5 promilow alkohola intus. Kaž so wukopa, muž ani jězbnu dowolnosć njeměješe.
Policija (15.06.22)
Smjertnje znjezbožił
Mučow. Tragiski wukónc měješe jězba 60lětneho wodźerja VW Sharana wčera dopołdnja na zwjazkowej dróze B 96 mjez Mučowom a Wulkimi Ždźarami. Z dotal njeznateje přičiny zajědźe muž na runym puću na lěwy bok jězdnje a zrazy do wjacorych štomow. Při tym so wón w jězdźidle zatłusny a hišće na městnje njezboža zemrě. Wobchadna njezbožowa słužba policije přičiny zražki přepytuje. Nimo policije běchu wohnjowe wobory wokoliny zasadźene. B 96 bě wjacore hodźiny dospołnje zawrjena.
Policija (14.06.22)
Paduch na stanowanišću
Bórk. Minjeny kónc tydźenja bě paduch na stanowanišću w Bórku při Budyskim spjatym jězoru po puću. Z bydlenskeho připowěšaka wza wón ćmowej mobilnej telefonaj sobu. Dale pokradny wón ze stana awtowy kluč, wotpowědne awto přepyta a z njeho 20 eurow spakosći. Dalšej škodowanej pobrachuje nětko jeje tablet. Dohromady nasta něhdźe 200 eurow škody. Policija pyta swědkow, kotřiž su něšto wobkedźbowali.
Mašinu zaso namakali
Rakojdy. Kolesowy nakładowak, kotryž běchu njeznaći spočatk junija w Lětonju pokradnyli, su nětko w lěsku mjez Rakojdami a Přiwćicami zaso namakali. Tehdy běchu so paduši na teren firmy podali a z twarskej mašinu płót přełamali. Jězdźidło bě někak 45 000 eurow hódne. Při namakanju pomhali su wobydlerjo kaž tež sobudźěłaćerjo škodowaneje firmy. Policija je slědy zawěsćiła a mašinu wobsedźerjam zaso wróći.
Policija (13.06.22)
Njetopyrja wućěrili
Běła Woda. Wo njewšědnu pomoc prošeše sobotu rano muž w Běłej Wodźe. Policiji wón zdźěli, zo bě so njeznate zwěrjo do jeho bydlenja zadobyło. Zastojnicy wuhladachu na to na wjerchu spanskeje stwy muža njetopyrja, kiž bě po wšěm zdaću z wočinjenym woknom do bydlenja přilećał. Zhromadnje so poradźi, njeprošeneho hosća pohnuć, bydlenje wopušćić a sej hinaši nóclěh pytać.
Policija (10.06.22)
Padušny porik lepili
Wojerecy. Žiwidła, kosmetiske twory, debjenki a elektriske nastroje w cyłkownej hódnoće 2 300 eurow chcyše padušny porik předwčerawšim we Wojerowskej kupnicy kradnyć. Personal pak to sčasom pytny a informowaše policiju. Muž w starobje 35 lět a 39lětna žona běštaj nimo toho z kolesomaj po puću, kotrejž buštej w Lipsku pokradnjenej.
Policija (09.06.22)
Awto z psom pokradnyli
Krušwica. Paduši njejsu wčera w Krušwicy jenož wosobowe awto pokradnyli, ale tež psa, kiž w jězdźidle bě. Wobsedźerka bě awto wotstajiła a so jenož dźesać mjeńšin wotsaliła. Jako so wróći bě 28 000 eurow drohi Mitsubishi fuk a z nim psyča, kotrejž Luna rěkaja. Policija z toho wuchadźa, zo su skućićeljo štyrinohača něhdźe wusadźili. Tohodla proša wobydlerjow na to dźiwać, hač něhdźe małeho bruneho psa bjez wobsedźerja wuhladaja. Wotpowědne pokiwy přijimuja zastojnicy w Běłowodźanskim policajskim rewěrje pod telefonowym čisłom 03576/ 26 20.
Policija (08.06.22)
Dowolnosć dwójnika pokazał
Hózk. Z přizjewjenjom jězdźenja bjez jězbneje dowolnosće dla skónči so swjatkownu póndźelu wulět 63lětneho muža w Hózku. Tam jeho policisća krótko po 10 hodź. kontrolowachu a chcychu wězo tež jeho jězbnu dowolnosć widźeć. Tu drje muž zastojnikam pokaza. Kaž so na to wukopa, pak njebě to jeho jězbna dowolnosć, ale ta dwójnika kontrolowaneho. Wón sam mjenujcy scyła žanu płaćiwu dowolnosć njewobsedźi, kaž policisća spěšne zwěsćichu. Pospyt, z pomocu dokumenta bratra-dwójnika zastojnikam něšto nabarbić, je potajkim chětro zwrěšćił. Kak dołho je lepjeny z jězbnej dowolnosću dwójnika jězdźił, z policajskeje rozprawy bohužel njewuchadźa.
Policija (07.06.22)
Při telefonje wobšudźili
Wojerecy. 37lětny muž z Wojerec je so minjeny dny z woporom telefonowych wobšudnikow stał a dźěl swojich nalutowanych pjenjez zhubił. Njeznaty bě so při telefonje jako sobudźěłaćer banki wudawał a zdźělił, zo bu z konta 37lětneho wjace hač 2 400 eurow wotknihowanych. Z tajnym čisłom, tak mjenowanej TAN móhł Wojerowčan wobkrućić, zo so suma zaso na jeho konto wróći. Do toho muž přizwoli. Z tym pak buchu pjenjezy hakle z jeho konta wotknihowane. Bórze na to so cuzy při telefonje znowa přizjewi a chcyše mějićela konta wospjet k přepokazanju pohnuć. Do toho wšak tón hižo njepřizwoli a informowaše policiju, dokelž bě drje pytnył, zo bu wobšudźeny.
Policija (02.06.22)
Njezbožo wosy dla
Łuty. Wosy w swojim awće dla so 54lětny wodźer Opela předwčerawšim we Łutach prawje na wobchad koncentrować njemóžeše. Insekt bě so na mjezwočo muža sydnyło. Jako chcyše wón jeho wućěrić, zajědźe přez wobchadnu kupu. Na wobchadnym znamjenju a awće nasta dohromady 16 000 eurow škody.
