Policija (14.03.22)
W kuchni so paliło
Biskopicy. Pjeć zranjenych wosobow je wuslědk wohenja, kotryž dyrbjachu wobornicy minjeny pjatk wječor w Biskopicach hašeć. 24lětna žona bě tam wolij w fritezy sćopliła, pozdźišo pak na to zaby, tak zo so wolij palić započa. Jeje 23lětny partner chcyše fritezu z wokna ćisnyć, štož pak jemu so njeporadźi a płomjenja so w kuchni rozpřestrěchu. K hašenju wołachu wjace hač 70 wobornikow ze 16 jězdźidłami. Zawinowarka poćerpje šok, 23lětny so na rukomaj ćežko zrani. Kura dla dyrbjachu dalšu 40lětnu wobydlerku domu a jeje dźěsći w starobje šěsć a třinaće lět ambulantnje zastarać.
Policija (11.03.22)
Droha technika fuk
Budyšin. Po wšěm zdaću cyle zaměrnje su so njeznaći spočatk tohole tydźenja na Budyskej Nagelowej do pincy wjaceswójbneho domu zadobyli. Z jednoho pinčneho wotdźěla pokradnychu woni kompletnu hudźbnu připrawu. Sobu wzali su basowu boksu subwoofer, dwaj wótřerěčakaj, tak mjenowany kónčny schodźenk, měšenski pult a mikrofon. Hódnota ekwipmenta wučinja dohromady něhdźe 4 500 eurow.
Policija (10.03.22)
Třo zranjeni po njezbožu
Běła Woda. Tójšto wěcneje škody a třo zranjeni su wuslědk wobchadneho njezboža, kotrež je so wčera rano na zwjazkowej dróze B 156 při wotbóčce do Wochoz stało. 61lětny chcyše ze swojim VWjom z pódlanskeje na hłownu dróhu wotbočić, njewobkedźbowaše pak předjězbu transportera a zrazy do njeho. 39lětny wodźer transportera a 29lětny sobujěducy so snadnje zraništaj. Šofera VWja dowjezechu do chorownje. Wěcna škoda wučinja něhdźe 60 000 eurow.
Policija (09.03.22)
Štom na awto padnył
Smjerdźaca. Na transporter 61lětneho muža je předwčerawšim pola Smjerdźaceje štom padnył. Na zbožo so nichtó zranił njeje. Škoda na awće wučinja něhdźe 2 000 eurow.
Policija (08.03.22)
Štyri pincy wurumowali
Budyšin. Wjaceswójbny dom w Budyšinje na hasy Při rězarni su sej njeznaći minjeny kónc tydźenja jako cil wupytali. Kaž policija rozprawja, zadobychu so woni do štyrjoch pincow. Pokradnyli su mjez druhim štyri awtowe kolesa, mountainbike a wšelki grat. Hódnota rubizny wučinja něhdźe 2 500 eurow. Nimo toho nasta 50 eurow wěcneje škody.
Policija (07.03.22)
Paduši w biopłunowej připrawje
Kodersdorf. Zo móžeš tež w biopłunowej připrawje tójšto kradnyć a tak wjele škody načinić, pokazuje pad, z kotrymž so policija w Kodersdorfje mjez Niskej a Zhorjelcom zaběra. Tam su so njeznaći w nocy na sobotu do běrowa biopłunoweje připrawy zadobyli. Woni spakosćichu wšelake elektroniske měrjenske nastroje, twarnišćowe radijo laptop a snadne mnóstwo pjenjez. Rubizna ma hódnotu něhdźe 10 000 eurow. Nimo toho zawostajichu 200 eurow wěcneje škody.
Policija (04.03.22)
Z drogami a bjez dowolnosće
Budyšin. Dobry čuch mějachu policisća we wčerawšich rańšich hodźinach, jako na Budyskej Schweitzerowej Mercedes Sprinter zadźeržachu a šofera kontrolowachu. Kaž zastojnicy zwěsćichu, njeje 28lětny wodźer jězdźidła scyła žanu płaćiwu jězbnu dowolnosć měł. Nimo toho je pola njeho drogowy test pozitiwnje na amfetaminy reagował. Muža su na to k „darjenju“ kreje přewodźeli.
Policija (03.03.22)
Rozbuchlinu w měše namakali
Krušwica. Podhladny měch su twarscy dźěłaćerjo předwčerawšim při wottorhanju juchoweje jamy w Krušwicy namakali. Dokelž bě na měše symbol rozbuchnjenja widźeć, informowachu policiju. Při prěnim přepytowanju so wukopa, zo jednaše so wo 30 kilogramow rozbuchliny, kajkaž bu w 1970tych lětach při rozbuchnjenju kamjenja wužiwana.
Policija (02.03.22)
Kołp awta atakował
Běła Woda. Z njewšědnym nadawkom bě předwčerawšim wječor policija w Běłej Wodźe konfrontowana. Wjacori šoferojo rozprawjachu wo agresiwnym kołpju na Baršćanskej dróze. Wulki ptak bě so rozsudźił so wosrjedź puća sydnyć a žane awta nimo njepušćić. Jězdźidła, kotrež chcychu nimo njeho jěć, je wón atakował, rěka w policajskej rozprawje. Tajkemu zadźerženju zastojnicy wězo přihladować njemóžachu. Woni kołpja popadnychu a donjesechu jeho k bliskemu Jahnowemu hatej, hdźež su rjeńše blečki hač runje na Baršćanskej dróze.
Policija (01.03.22)
Přećiwo koronapolitice protestowali
Budyšin/Zhorjelc. Po informacijach policajskeje direkcije Zhorjelc je so we wokrjesomaj Budyšin a Zhorjelc wčera dohromady něhdźe 10 500 ludźi na protestach přećiwo koronapolitice wobdźěliło. Wjetšina demonstrantow bě měrliwa, přiwšěm přizjewichu dwacećoch statnemu rěčnistwu přestupjenja porjada resp. ranjenja swobody zhromadźowanja dla.
