Policija (28.04.22)
Z helikoptera woheń wuhladali
Sulšecy. Krótko do chodojtypalenja je nětko zaso čas, zo njedočinkojo hromady suchich hałzow dočasa wotpaleja. Stało je so to wčera krótko po połnocy na polu pola Sulšec blisko Kulowa. Woheń napadnył njeje snano jednomu z wobydlerjow, ale wobsadce helikoptera, kotryž runje nimo lećeše. Pilot informowaše na to wohnjowu woboru. Hašeli pak kameradojo njejsu, ale jeničce kontrolowachu, kak so hromada wotpali.
Policija (27.04.22)
Mało rubizny, wjele škody
Wojerecy. Domčki w zahrodkownišćach su stajnje zaso woblubowane cile paduchow. Zwjetša pak namakaja tam mało, štož móža pokradnyć. Ćim wjetša je wěcna škoda, kaž najnowši pad z Wojerec pokaza. Tam běchu so njeznaći w nocy na póndźelu hnydom do 14 domčkow w zahrodkownišću na Hasy Liselotty Herrmann zadobyli. Pokradnyli su kabl, truhanski nóž, špihel, točensku mašinu a cigarety w cyłkownej hódnoće 350 eurow. Wěcnu škodu pak trochuje policija na něhdźe 3 900 eurow. Policija pad dale přepytuje.
Policija (26.04.22)
Smjertnej woporaj na awtodróze
Budyšin. Tragiski wukónc měješe wobchadne njezbožo předwčerawšim na awtodróze A 4 mjez Budyšinom a Zhorjelcom. 64lětny wodźer Opela bě wokoło 22 hodź. do směra na Zhorjelc po puću, jako swoje awto hižo pod kontrolu njeměješe, do srjedźneho wobhrodźenja zrazy a so zwjertny. 76lětna wodźerka transportera po wšěm zdaću njewobswětlene awto pytnyła njeje a frontalnje do njeho zrazy. 64lětny a jeho 63lětna sobujěduca na městnje njezboža zemrěštaj.
Policija (22.04.22)
Z předešćnikom biłoj
Wojerecy. We Wojerowskej kupnicy chcyštaj 36lětny muž a 34lětna žona předwčerawšim twory w hódnoće 50 eurow pokradnyć a schowaštaj je w dźěćacym wozyčku. Přistajeny pak to pytny a jeju narěča. Na to započeštaj skućićelej nakupowanske korbiki do přistajeneho mjetać a jeho z předešćnikom biještaj. Skónčnje so personalej tola poradźi, podhladneju zadźeržeć a přiwołanym policistam přepodać.
Policija (21.04.22)
Paducha přejěł
Čorny Chołmc. Zwěrjeći paduch kokoše je předwčerawšim wječor swój njeskutk ze žiwjenjom zapłaćił. 39lětny muž bě ze swojim wosobowym awtom typa VW Touran na zwjazkowej dróze B 97 wot Čorneho Chołmca do Njedźichowa po puću, jako liška wotlěwa doprawa puć přeprěči a do awta zaběža. Zwěrjo na městnje njezboža slakny. Liška bě sej krótko do toho kokoš popadnyła a měješe ju při zražce hišće w klamje. Na awće nasta 500 eurow škody.
Policija (20.04.22)
Bydlenski mobil pokradnył
Brěza. Wobsedźerjo bydlenskeho mobila su jutry póndźelu popołdnju w Brězy (Birkau) pola Hodźija přestawku zapołožili. Jako so po poł hodźinje wróćichu, bě jězdźidło preč. Policija wuhlada je bórze na to w Strahwaldźe, hdźež awto do směra na Žitawu jědźeše. Zastojnicy chcychu mobil zadźeržeć, šofer pak spyta ćeknyć, při čimž policajske awto wobškodźi. Zajěwši na łuku spyta skućićel pěši twochnyć. Jeho pak spěšnje dosahnychu a zajachu. Škoda wučinja 17 000 eurow.
Policija (19.04.22)
Předjězbu njewobkedźbował
Dźěwin. Wjacori zranjeni běchu wuslědk wobchadneho njezboža jutrowničku popołdnju w Dźěwinje. 91lětny wodźer awta njebě tam předjězbu dalšeho jězdźidła wobkedźbował a do njeho zrazy. Štyri wosoby so ćežko zranichu, mjez nimi bě dźewjeć měsacow stary ćěšenk.
Policija (14.04.22)
W zahrodowych domčkach pobyli
Ćisk. Zahrodkownišćo bě cil paduchow předwčerawšim w Ćisku. Tam zadobychu so do pjeć zahrodowych domčkow a do dalšich pódlanskich přitwarkow. Z nich pokradnychu najwšelakoriši grat, mjez druhim akušrubowak a piłu. Hódnotu rubizny trochuje policija na 1 500 eurow. Nimo toho načinichu skućićeljo 800 eurow wěcneje škody.
Policija (13.04.22)
Do nakładneju awtow zrazył
Pančicy-Kukow. Wobchadne njezbožo je so wčera připołdnju na kromje Pančic-Kukowa stało. Z Kamjenca přijěducy wodźer Mercedesa chcyše nakładne awto přesćahnyć, njewobkedźbowaše pak napřećo přijěducy Lkw a skónčnje do wobeju zrazy. Dwě wosobje z Mercedesa dyrbjachu do chorownje dowjezć, wodźerjej Lkw-jow so njezraništaj. Statna dróha S 100 bě mjez wotbóčku do Jawory a Pančicami dwě hodźinje zawrjena.
Policija (12.04.22)
Ćežke njezbožo
Rachlow. 38lětny muž budźe so dyrbjeć dlěje w chorowni lěkować dać. Tón bě zašłu sobotu z Wulkich Ždźarow na wokrjesnej dróze 9221 z awtom typa Opel Astra znjezbožił. W křiwicy zajědźe wón z jězdneje, při pospyće směr korigować, zrazy do dweju štomow, prjedy hač njewosta wosrjedź jězdneje stejo. Šofer so při njezbožu ćežko zrani. Awto je dospołnje skóncowane.
