Policija (03.02.22)
Po njezbožu so zminył
Kamjenc. Dotal njeznateho wodźerja jězdźidła pyta policija w Kamjencu. Wón bě so minjenu póndźelu po wobchadnym njezbožu z awtom na Macherowej z městna njezboža zminył, štož po zakonju dowolene njeje. 57lětny šofer Toyoty bě swoje awto rano něhdźe w 7.30 hodź. na Macherowej wotstajił. Jako so wón připołdnju wróći, dyrbješe wustróžany zwěsćić, zo bě zady naprawo něchtó do Toyoty zrazył. Škoda wučinja po informacijach policije něhdźe tysac eurow. Při prědnim woknje wuhlada škodowany cedlu, na kotrejž drje bě zawinowar swoje daty zawostajił. Wjedra dla pak cedla hižo čitajomna njebě, dokelž bě dešćik pismo zamórał. Policija prosy nětko swědkow a předewšěm wosobu, kotraž bě při awće wonu cedlu zawostajiła, so na Kamjenskim policajskim rewěrje pod telefonowym čisłom 03578/ 35 20 abo druhdźe pola policije přizjewić.
Policija (02.02.22)
Na wołanje susoda reagowała
Běła Woda. Wobhladniwje jednała je předwčerawšim wječor wobydlerka na Puškinowej w Běłej Wodźe, jako słyšeše z bydlenja swojeho susoda, kak wón wo pomoc woła. Nablaku informowaše wona měšćanski policajski rewěr, kotryž je hnydom wobsadku policajskeho awta pósłał. Z pomocu wohnjowych wobornikow dóstachu so zastojnicy do bydlenja 91lětneho. Wón bě padnył a njemóžeše sej hižo sam pomhać. Wuchowanscy sanitetarjo so na to wo muža starachu. Kedźbliwej žonje, kotraž bě wołanje starca słyšała a pomoc organizowała, so policija wuraznje dźakuje.
Policija (01.02.22)
W domje woheń wudyrił
Budyšin. Wulka škoda nasta wčera rano při wohenju w bydlenskim domje na Nowoměšćanskej dróze w Budyšinje. Po wšěm zdaću běchu podružnicy rano zahe kachle zatepili. Bórze na to sapachu płomjenja hižo z třěchi twarjenja. Přiwołani wohnjowi wobornicy je zhašachu. Škodow wohenja a hašenskeje wody dla najprjedy raz nichtó w domje bydlić njemóže, kaž z policajskeje rozprawy wuchadźa. 48lětneho muža dyrbjachu zranjeneho do chorownje dowjezć, dokelž bě so při hašenju zranił. Rozměr škody wučinja něhdźe 150 000 eurow.
Policija (31.01.22)
W bydlenju křesło zapalił
Budyšin. W swojim bydlenju na Budyskej Jordanowej je 46lětny muž w nocy na njedźelu křesło zapalił a bydlenje na to wopušćił. Pytnywši kur alarmowachu druzy wobydlerjo domu wohnjowu woboru, kotraž woheń zhaša. Zranił so nichtó njeje. 46lětneho policija w bliskosći lepi a zaja.
Policija (28.01.22)
Smě nětko tři měsacy nóžkować
Zhorjelc. Wjace hač dwójce tak spěšne kaž dowolene bě předwčerawšim awto typa Mercedes, kotrež lepichu při měrjenju spěšnosće na awtodróze A 4 pola Zhorjelca. Wot kontrolowanych 1 800 jězdźidłow bě 154 přespěšnje po puću. 36 z nich dóstanu warnowanje, 118 pak pokutu. Rekord docpě wodźer čěskeho Mercedesa. Jeho błysknychu při dowolenych 80 km/h ze 165 km/h. Muž dyrbi nětko pokutu 800 eurow płaćić, dóstanje dwaj dypkaj w Flensburgu a dyrbi tři měsacy nóžkować.
Policija (27.01.22)
Grafitije mórali
Budyšin. Za swoje pozdatne wuměłske kmanosće su sej njeznaći wutoru wječor w Budyšinje přewšo njepřihódne městno wupytali. Woni dóstachu so do Domu na Žitnych wikach a popryskachu wot třećeho poschoda hač k parkowanskemu domej wšelake płoniny ze zelenej a šěrej barbu. Tak načinichu něhdźe 1 000 eurow škody.
Kašćiki wody zhubił
Rachlow. Njewšědna bě přičina wobchadneho njezboža předwčerawšim dopołdnja blisko Rachlowa pola Kulowa. Wodźer Citroëna bě tam w křiwicy ze swojeho připowěšaka wjacore kašćiki blešow mineralneje wody zhubił. Po wšěm zdaću wone prawje přiwjazane njeběchu. W samsnym wokomiku přijědźe transporter napřećo, zrazy do kašćikow a sej swoje awto wobškodźi.
Policija (26.01.22)
Do hale so zadobyli
Nowa Łuka. Minjeny kónc tydźenja běchu so njeznaći do hale firmy w Nowej Łuce w gmejnje Halštrowska Hola zadobyli. Tam pokradnychu mjez druhim chłódźenskej agregataj w cyłkownej hódnoće něhdźe 1 300 eurow. Nimo toho načinichu 300 eurow wěcneje škody.
Policija (25.01.22)
Dwójce pod drogami z awtom jěł
Pěskecy. Njepowučomny bě předwčerawšim 43lětny muž, kotrehož zadźeržachu w Pěskecach. Test je pola njeho pozitiwnje na amfetaminy reagował, štož wunjese jemu pokutne jednanje. Na to dyrbješe wodźer Opela w Kamjenskej chorowni krej wotedać. Tam zastojnicy muža powučichu, zo tón dźeń hižo z awtom jězdźić njesmě. Jako woni chorownju wopušćichu, pak widźachu, zo 43lětny ze swojim Opelom wotjědźe. Tuž jeho znowa zadźeržachu a wozjewichu přećiwo njemu druhe pokutne jednanje.
Policija (24.01.22)
Z kolesom ćeknyć chcył
Rakecy. Dokelž jeho koleso porjadnje wobswětlene njebě, chcychu policisća předwčerawšim krótko po 21 hodź. blisko Rakečanskeho kěrchowa 37lětneho muža kontrolować. Tón scyła na to njemysleše so po přikazach zastojnikow měć, a ćekny. Policisća pak jeho bórze dosahnychu. Při přepytowanju namakachu pola njeho tyzu konopje a škleńčanu rołku z crystalom.
Z wopačnym čisłom jězdźił
Běła Woda. Wodźerja mopeda je policija sobotu wječor w Běłej Wodźe kontrolowała. Při přepruwowanju jeho dokumentow zastojnikam napadny, zo 53lětny scyła žanu jězbnu dowolnosć nima, dokelž běchu ju jemu hižo před časom sćazali. Nimo toho bě na jězdźidle typa Simson zawěsćenske čisło z lěta 2012 přičinjene. Pozdźišo so wukopa, zo płaćiwe zawěsćenske čisło pola šofera doma ležeše. Dale jěć wón wězo njesmědźeše, ale dyrbješe moped domoj ćišćeć.
Policija (21.01.22)
Po kontroli do jastwa
Wojerecy. Jězbu pod wliwom drogow su policisća Wojerowskeho rewěra předwčerawšim we Wojerecach skónčili a při tym z přikazom zajeća pytaneho 35lětneho zajeli. We wobłuku wobchadneje kontrole zastojnicy wodźerja Forda zadźeržachu. Drogowy test reagowaše pozitiwnje na amfetaminy. Dalšu jězbu njetrjebachu jemu wulce zakazać, ale dowjezechu jeho hnydom do jastwa.
