Halowy koparski turněr wólnočasnych koparskich cyłkow z mjenom „30 lět fanowy klub BFV 08 – swěrni“ bě wosebite wubědźowanje, na kotrymž so serbscy koparjo wobdźělichu.

Połojca z na tutym dnju zasadźenych Worklečanskich akterow běchu talentowani štyrnaćelětni młodźi hrajerjo. Starobny přerězk koparjow bě na tutym dnju tuž 21,3 lět. Tajki młody wólnočasny koparski cyłk drje hišće ženje hromadźe hrał njebě.

Do turněra startowachu Worklečenjo ze zbožownym dobyćom 2:1 přez wrota debitantow Franca Šewca a Luci Šewca, a to přećiwo teamej z mjenom ,,43 bjez mloka“.

Suwerenišo wotběža druhe mocyměrjenje přećiwo zarjadowarjam koparskeho ewenta z mjenom ,,Swěrni“. Milan Šmit postara so z wuspěchom 3:0 ze swojim hatrikom nimale sam wo tři dalše ličaki.

Tež mustwo ,,Módrokrejni Kamjenica“ jako třeći kontrahent běchu stari znaći. Přećiwnik spěšnje 1:0 nawjedowaše. Jan Herman ze swojimi premjernymi wrotami kaž tež Tomaš Čornak a Luca Šewc pak wuslědk wobroćichu.