Kulturny turizm we Łužicy so zaměrnje wuwiwa
Slepo (SN/mwe). Po tym zo su kolesowansku šćežku Serbske impresije ze Stróže přez Radwor, Ralbicy a Chrósćicy do Pančic-Kukowa hižo před dlěšim časom ze serbskim lipowym łopješkom woznamjenili, připrawjeja tuchwilu při Bórkowskich groblach cyłkownje 108 nowych němsko-delnjoserbskich taflow. Wone njejsu w labyrinće rěčkow jeno přinošk k lěpšej orientaciji.
Dwurěčne tafle słuža tomu, zo njebychu so mjena, kaž Prěčna a Sławjeńc, pozabyli. Tuž je Bórkowski hamt jako prěni błótowski we wobłuku masterskeho plana „přirodoznjesliwy wódny turizm Spjewja-Błóta“ hromadźe z domjacymi turistiskimi předewzaćemi a čołmarjemi ličbu taflow postajił.
