Poskićeja zaso poradźowanja
Namjety za myto zapodać
Budyšin. Domowinske župy a serbske towarstwa kaž tež wšitcy jednotliwcy su namołwjeni hač do 30. junija swoje namjety třěšnemu zwjazkej zapodać, kotre zasłužbne wosobiny měli lětsa z Mytom Domowiny, Mytom Domowiny za dorost a čestnym znamješkom wuznamjenić.
Z Mytom Domowiny česći třěšny zwjazk tych, kotřiž so zaměrnje a wuspěšnje za zachowanje a wozrodźenje serbskeje kultury, wosebje pak serbskeje rěče zasadźeja. Myto Domowiny za dorost spožča młodostnej/młodostnemu abo tež skupinje, kiž so na wusahowace wašnje za serbsku rěč a kulturu angažuja. Z čestnym znamješkom připóznawa Domowina zasłužby w towarstwowym dźěle, zwoprawdźace program a směrnicy třěšneho zwjazka.
Mytowanski wuběrk prosy wo to, za namjet nowy formular wužiwać, kotryž je na internetnej stronje www.domowina.de/hsb/domowina/wuberki/mytowanski-wuberk/formular-za-zapodace-namjeta wozjewjeny. Wupjelnjeny dokument móža namjetowacy z mejlku referentej za kulturne naležnosće Clemensej Škodźe na abo z listom Domowinje, Póstowe naměsto 2, 02625 Budyšin pósłać.
Dźakne kemše njebudu
Zapósłancy wuradźuja
Žane spěšne awta
Namołwja k wopomnjenju
Kamjenc. W mjenje Spěchowanskeho towarstwa za wopomnišćo wonkowneho lěhwa kaceta Groß Rosen, w Kamjencu-Knježim dole, namołwja čłon towarstwa Uwe Hauschild wobydlerjow, 8. meje při wopomnišćach za wopory Druheje swětoweje wójny w Lessingowym měsće kwětki połožić. Na te wašnje maja so narunać wopomnjenske zarjadowanja, kotrež tuchwilu móžne njejsu. Wobydlerjo pak měli hygieniske předpisy a wotstawk dodźeržeć.
Wotewru park błudźenkow
Wochozy. Ručež sakske statne knježerstwo dalše wolóženja zjawneho žiwjenja wobzamknje, chcedźa tež Wochožanski park błudźenkow přichodnu póndźelu, 4. meje, zaso wočinić. „Wobžarujemy, zo budźe park 1. meje hišće zawrjeny. Tak dyrbi naša tradicionalna předań rostlin wupadnyć“, praji zamołwita za marketing a zjawnostne dźěło spěchowanskeho towarstwa parka Anita Schwitalla. Za dodźerženje hygieniskich a wěstotnych předpisow su we Wochozach koncept zdźěłali. Tež za předań zakuskow maja wšitko spřihotowane.
Terminy jenož online
Budyšin. Zo bychu čakanske časy skrótšili a tak strach natyknjenja w čakarnjach jězdźidłowych přizjewjernjow w Budyšinje, Wojerecach a Kamjencu pomjeńšili, nětko terminy za přizjewjenje jězdźidła wot spočatka tydźenja jenož hišće online rozdawaja. Priwatne wosoby móža sej same swobodny termin online rezerwować. Knihowanski system sćele jim hnydom wobkrućenje, kotrež dyrbja k terminej sobu přinjesć. Na e-mejlnu wotmołwu wěcywobdźěłarja njetrjebaja čakać. Online-serwis Budyskeho krajnoradneho zarjada nańdu zajimcy pod www.landkreis-bautzen.de/kfz-kennzeichen.php.
Kubłansku wuprawu přesunu
Budyšin. Přihotowanski wuběrk seniorow Serbskeho šulskeho towarstwa je doskónčnje rozsudźił, zo za lětsa w meji planowanu pjećdnjowsku wuprawu „Podłu Romantiskeje dróhi“ koronapandemije dla klětu spočatk meje přewjedu. Zajimcow sčasom wo nowym terminje informuja, kaž předsydka SŠT Ludmila Budarjowa zdźěli.
Kedźbu, škotowarjo!
Budyšin. Za přichodnu wutoru, 28. apryla, planowany serbski škotowy turněr seniorow dyrbi koronoweje pandemije dla wupadnyć. Přichodny termin je 26. meje w 14 hodź. pola Krawčikec w Chrósćicach, jeli to škitne naprawy potom dowola. Tradiconalny wulět škotowarjow wotměje so wutoru, 8. septembra. Jězba powjedźe do Drježdźan, hdźež pojědu z parnikom a wobhladaja sej wustajeńcu „Starych mištrow“ kaž tež katedralu a cyrkej Našeje knjenje. Přizjewić móža so zajimcy pola Alojsa Langi w Konjecach (tel. 03 57 92 / 5 01 26) abo pola Měrćina Nowaka w Lubiju (tel. 0 35 85 / 40 24 20).
Čerwjenu kartu pokazać
Budyšin. We wobchodach Budyskeho wokrjesa trjebaja kupcy wot minjeneje póndźele škit před nosom a hubu. Štóž to nječini, tomu móža mějićeljo wobchoda čerwjenu kartu pokazać. Tajku poskića krajnoradny zarjad nětko jako download. Je to pokiw tym kupcam, kotřiž so tajkemu škitej wobaraja.
Pjenjezy darja towarstwu
Budyšin. Ralbičanscy młodostni wokoło Dennyja Gloxyna, kotřiž dóstachu we wobłuku wubědźowanja Serbski poskitk tydźenja w syći (SPTWS) myto 100 eurow, chcedźa pjenjezy za dobry skutk přewostajić. Rozsudźili su so za Drježdźanske towarstwo Sternenkinder, kotrež poskića žarowansku pomoc a pohrjeby za dźěći, kotrež su w maćernym žiwoće zemrěli.
Dyrbja štomy pušćeć
Połpica. W Dubjanskim lěsu da Němska zwjazkowa załožba za wobswět wot spočatka tydźenja we wjetšim wobjimje štomy pušćeć. Potrjechene su lěsy při wokrjesnych pućach wokoło Połpicy, a to do směra na Lemišow, Lichań a Nowu Wjes. Štomy hižo wěsće dosć njesteja, čehoždla móhli nimojěduce awta a kolesowarjow wohrozyć. Dyrbja je tuž pušćeć.
Tójšto přeńdźenjow zwěsćili
Budyšin. W běhu jednoho měsaca je policija w Budyskim wokrjesu wjace hač 600 přeńdźenjow přećiwo postajenjam korony dla zwěsćiła. Něhdźe połojca sta so na terenje Budyskeho policajskeho rewěra. Dwurěčne gmejny su lědma potrjechene, kaž Zhorjelska direkcija zdźěla. Jeje statistika pak njerozeznawa mjez městami a wjesnej kónčinu.
Dny zahrodnistwa njebudu
Koćina. Za kónc tydźenja wot 24. do 26. apryla planowane dny wotewrjeneho zahrodnistwa so lětsa njewotměja. To zdźěli našemu wječornikej Koćinske Čórlichec zahrodnistwo. Přičina wotprajenja je, kaž tele dny nimale wšudźe, koronapandemija. Wšako přeco hišće njejsu wjetše zhromadźowanja ludźi dowolene. Tohodla tež njebudźe móžno Čórlichec swójsku na róženjach praženu zelowu kołbasku woptać, ze zahrodnistwa rěka. Přiwšěm pak móža so kupcy w zwučenych wotewrjenskich časach pola Čórlichec w Koćinje a Kulowje – wot póndźele do pjatka w času wot 9 do 18 hodź. a sobotu wot 9 do 12 hodź. – wo najnowšich poskitkach wobhonić a so w zahrodniskich naležnosćach poradźować dać.
Seminar přez internet
Budyšin. Wobrazy lokalnych telewizijnych sćelakow z časa wot 1990 do 1995 budu hłowna tema webinara, potajkim seminara přez internet, kotryž wotměje so jutře, štwórtk, we 18 hodź. Po předstajenju telewizijnych wurězkow chcedźa wo dopomnjenkach na towaršnostny přewrót a lěta po tym rěčeć. Link nadeńdu zajimcy na stronje www.saek.de.
