Baletny wječor ze zawodom
Budyšin. Swoju baletnu inscenaciju „Što zwostanje?“ předstaji Serbski ludowy ansambl jutře, štwórtk, w 19.30 hodź. na swojej žurli w Budyšinje. K tomu poskići wot 19 hodź. zawod do krucha w předrumnosći Röhrscheidtoweje bašty. W baletnej formje rozestajeja so wuměłcy z lokalnymi temami Hornjeje Łužicy.
Nowa antilopa widźeć
Wojerecy. Po prěnich dnjach zažiwjenskeho časa pokazuje so nětko we Wojerowskim zwěrjencu nowa antilopa. Dotal mějachu tam dwě skoćeći družiny „Rappenantilope“. Jedne z njeju z mjenom Agnes pak dyrbjachu wysokeje staroby dla kónc februara zasparnić. Za Malindu namakachu w Kopenhagenskim zwěrjencu nowu połdralětnu towaršku, kotruž su srjedź měrca do Łužicy přiwjezli. Mjeno wona hišće nima. Zo by so na swoju dźesaćlětnu towaršku kaž tež na hladarjow zwučiła, je nowa wobydlerka zwěrjenca najprjedy hišće we wosebitym wotdźělu, hdźež pak ju hižo hdys a hdys wuhladaš, kaž Wojerowski zwěrjenc w nowinskej informaciji zdźěli.
Znowa za dobry skutk
Jutře do muzeja
Wojerecy. W rjedźe „Wutoru do měšćanskeho muzeja“ wotměje so jutře w 17 hodź. we Wojerowskim měšćanskim muzeju přednošk „Prěni krajni radźa Wojerowskeho wokrjesa – swójba von Götz auf Hohenbocka“. Z njeje wuńdźechu třo krajni radźa. Přednošować budźe bywši wyši měšćanosta Horst-Dieter Brähmig. Zastup płaći tři eura.
Koncertuja k jubilejej
Łaz. Składnostnje 200. narodnin Jana Arnošta Smolerja wěnuje jemu Serbski ludowy ansambl wosebity koncert. Wón wotměje so pjatk, 18. měrca, w 19 hodź. we Łazowskej cyrkwi a jutrowničku, 27. měrca, we 18 hodź. na Budyskej žurli SLA. Za hornjo- a delnjoserbskich komponistow wšelakich žanrow a generacijow běše a je Smolerjowa zběrka „Pěsničkow“ drohotny pokład a zdobom wužitny nastork, štož so w chórowych sadźbach kaž tež w instrumentacijach za serbske ludowe instrumenty wotbłyšćuje. Nimo hižo znatych twórbow swědča předewšěm prapremjery tohole koncerta znowa wo wunošnym rozestajenju z kulturnym namrěwstwom. Lisćiki dóstanu zajimcy w Serbskim ludowym ansamblu (tel. 03591/358 111 abo z mejlku na adresu ).
Spušćadło ponowjeja
Na wiki jutrownych jejkow
Slepo. 19. raz wotměja so jutře a njedźelu stajnje wot 10 do 17 hodź. wiki jutrownych jejkow w Slepjanskim Serbskim kulturnym centrumje. Wopytowarjo móža 35 debjerjam jutrownych jejkow při dźěle přihladować a sej jich wudźěłki kupić. Wo kulturne wobrubjenje postara so jutře w 15 hodź. skupina žonow Rowniske glosy a njedźelu w 10 hodź. Slepjanski dźěćacy a młodźinski ansambl. Na rjemjeslniskich wikach budu wuměłscy rjemjeslnicy runje tak zastupjeni kaž wikowarjo regionalnych wudźěłkow.
Rejuja serbski folk
Lipsk. Dźěłarnička serbskich folk-rejow wotměje so jutře, sobotu, wot 19 hodź. w Lipšćanskim bydlenskim kompleksu „Besser wohnen“ na Weißenfelskej dróze 52. Tam chcedźa folklorne reje na moderne wašnje z folkowej hudźbu, mócnymi rytmami kaž tež z njeznatymi spěwami předstajić. Rejwanske abo hudźbne znajomosće trěbne njejsu.
Kniha wo prawach mjeńšin
Radźićeljo wuradźuja
Worklecy. Ze směrnicami wo spěchowanju komunalneho dróho- a mostytwara zaběraja so čłonojo Woklečanskeje gmejnskeje rady na swojim posedźenju jutře, štwórtk, w 19 hodź. we Worklečanskej šuli. Dale diskutuja mjez druhim wo změnje policajskich wustawkow.
Tohorunja jutře, ale w 19.30 hodź. započnje so posedźenje Chróšćanskeje gmejnskeje rady, kotrež wotměje so tónraz w Nukničanskej barace. Tam chcedźa mjez druhim lětuši hospodarski plan schwalić a wo zarunanju čestnohamtskeho dźěła porěčeć. Wobě posedźeni stej zjawnej a wobydlerjo tuž přeprošeni.
Šulerjo wustajeja
Wojerecy. „Z wohenja rodźene“ rěka wustajeńca šulerjow Wojerowskeho Foucaultoweho gymnazija, kotruž pokazaja wot jutřišeho hač do 10. meje na Wojerowskim hrodźe. W přehladce widźeć budu wuměłske dźěła, nastate w minjenymaj lětomaj we wukonowym kursu wuměłstwa mjenowaneho kubłanišća. Wopytowarjo wuhladaja mjez druhim bronzowe plastiki, mólby, grafiki a kolaže. Wustajeńca je špihel młodeho wuměłskeho tworjenja a zdobom wuraz mnohostronskich talentow, fantazije a kmanosćow młodych ludźi.
Zběraja stare železo
Ralbicy. Šulerjo Ralbičanskeje Serbskeje zakładneje šule a jich starši njech wobkedźbuja, zo steji při tamnišim kubłanišću wot dźensnišeho hač do 17. měrca kontejner za železo.
Přeprošeja žony
Budyšin. Składnostnje mjezynarodneho dnja žonow přeproša Budyski měšćanski zwjazk Lěwicy wšitke žony jutře, 8. měrca, w 17 hodź. do Budyskeho Serbskeho domu. Wo zabawu postara so Dietmar Seitz ze swojimi epizodami wo Alfonsu Zitterbacke.
Wužadanja za město
Budyšin. Na zjawnu rozmołwu přeproša Budyska CDU zajutřišim, srjedu, 9. měrca, w 19 hodź. do kehelownje. Tam chcedźa so z financnym měšćanostu dr. Robertom Böhmerom wo přichodnych wužadanjach za Budyšin rozmołwjeć.
PoŠtyrjoch w hospodźe
Chrósćicy. „Hdźež so spěwa, radosć kćěwa“ móhło rěkać hesło jutře, sobotu, w 19.45 hodź w Chróšćanskej putniskej hospodźe. Tam zanjese serbska muska spěwna skupina PoŠtyrjoch stare a nowe štučki. Wšitcy lubowarjo serbskeho a-cappella-spěwa su wutrobnje přeprošeni do přitulneho přizemja na mały komorny koncert. Budźe to hižo předposlednje zarjadowanje tejele kulturneje zymy w putniskej hospodźe.
Šulerjow přizjewić
Worklecy. Wot póndźele, 29. februara, hač do pjatka, 4. měrca, móža starši swoje dźěćo za nowy 5. lětnik Worklečanskeje Serbskeje wyšeje šule „Michał Hórnik“ přizjewić. Składnosć za to maja póndźelu wot 8 do 12.30 hodź., wutoru wot 8 do 17 hodź., srjedu wot 8 do 15 hodź., štwórtk wot 8 do 14 hodź. a pjatk wot 8 do 10 hodź. Komuž so termin w mjenowanych časach njehodźi, njech sej pod telefonowym čisłom 035796/ 96 831 hinaši termin dojedna.
Kak dale w měsće?
Dale a wjac zadobywanjow
Połčnica (RLö/SN). W Połčnicy kopja so wot spočatka lěta zadobywanja. Z tym zwjazane su padustwa. Tež policija tónle zjaw jara dokładnje wobkedźbuje. Tele delikty wujasnić słuša mjeztym k ćežišćam dźěła Kamjenskeho policajskeho rewěra. „Městny wobydlerski policist, patrulje Kamjenskeho rewěra, zwjazkoweje policije a wobydlerjam njeznate operowace mocy su wodnjo a w nocy w měsće po puću.“ To zdźěli Thomas Knaup, nowinski rěčnik Zhorjelskeje policajskeje direkcije. Hač do 13. februara su wobydlerjo policiju lětsa hižo 24 króć zadobywanja abo pospytaneho zadobywanja dla wołali. Tójšto starosćiwych Połčničanow podawa so nětko kóždy wječor na stražu, štož policija kritisce posudźuje.
Pytaja najlěpše wukony
Stipendije za kurs čěšćiny
Budyšin (SN). Čěske knježerstwo přewostaja zajimowanym Serbam přez posrědnistwo Rěčneho centruma WITAJ lětsa zaso cyłkownje pjeć stipendijow za wobdźělenje na intensiwnym kursu čěšćiny. Prěni kurs budźe wot 29. julija do 26. awgusta 2016 na Praskej Karlowej uniwersiće a druhi wot 22. awgusta do 9. septembra na Juhočěskej uniwersiće Česke Budějovice. Dalše informacije a přizjewjenske formulary namakaće na internetnej stronje www.witaj-sprachzentrum.de. Zajimcy njech sposrědkuja wupjelnjeny přizjewjenski formular hač do 15. měrca Rěčnemu centrumej WITAJ.
Přednošuje wo ekskursiji
Mužakow (AK/SN). W nadawku załožby Mužakowskeho parka hrabje Pücklera bě etnologowka dr. Kerstin Volker-Saad loni w oktobru a nowembru w Etiopiskej a Sudanje. Wo swojich dožiwjenjach a dopóznaćach na ekskursiji přednošuje wona štwórtk, 25. februara, we 18.30 hodź. na swjedźenskej žurli Noweho Mužakowskeho hrodu.
Pytaja posłužbnika
Prěni króć hódnoća tykanc
Budyšin (SN). Po tym zo su so tež serbscy pjekarjo zašły tydźeń na hódnoćenju chlěba a całtow w Budyšinje wobdźělili, přihotuje pjekarske zjednoćenstwo Budyskeho wokrjesa prěni króć wubědźowanje słódkich specialitow, tykancow. Premjera budźe 18. měrca na Kamjenskich wikach „WIR“.
Za wjace serbskosće
Kalawa (SN). Hižo něšto lět přewjeduje Šula za delnjoserbsku rěč a kulturu Choćebuz tež wjacore zarjadowanja w Kalawje. Kaž nawodnica šule Marja Elikowska-Winklerowa našemu wječornikej zdźěli, su to přednoški k serbskopolitiskim a stawizniskim temam, a to ze serbskimi referentami. Wone wotměwaja so w kooperaciji z tamnišim zarjadnišćom „Haus für Heimatgeschichte“, z jeho spěchowanskim towarstwom a z cyrkwju. Šula studijne jězby organizuje tež do Kalawy, Wětošowa a Lubina.
Klinika třeći pječat dóstała
Křesćan Krawc čitał
Delni Wujězd (JoS/SN). Serbski spisowaćel Křesćan Krawc je we wobłuku „čitanskeje zymy“ njedźelu w Delnim Wujězdźe ze swojeho noweho romana „Ende vom Paradies“ čitał. Domizniske towarstwo bě „čitansku zymu“ před 15 lětami załožiło. Štyri tajke zymske zarjadowanja su jara woblubowane. Domizniske towarstwo dźěła z nakładnistwom Lusatia wusko hromadźe, a nakładnik dr. Frank Stübner dokładnje wě, kotru literaturu sej ludźo přeja. Po čitanju chcychu Delnjowujězdźenjo a jich hosćo hišće wjele wot Křesćana Krawca wědźeć, mnozy sej jeho roman skazachu.
Wopominanska Boža mša
Kamjenc (SN). W kapałce Kamjenskeje chorownje maltezow prawidłownje zemrětych wopominaja. Přichodna Boža mša za wšěch, kotřiž su wot srjedź oktobra 2015 hač do kónca januara 2016 w chorowni zemrěli, budźe jutře, 17. februara, w 16.30 hodź. „Chcemy mjena zemrětych mjenować, a za kóždeho zapalimy swěčku při jutrownej swěčce a stajimy ju na wołtar. Swójbni a bliscy přiwuzni su njewotwisnje wot nabožneje zwjazanosće přeprošeni“, nowinska rěčnica chorownje Ines Eifler dźěli.
Kurs serbšćiny za dźěći
