Ze zhromadneho zarjadowanja župy „Handrij Zejler“ a Serbskeho sejma

Wojerecy (SN/MiR). Wosobinske dožiwjenja a nazhonjenja z Wojerec pochadźacych ludźi, dołho w měsće zasydlenych Domowinjanow, staršich kaž tež na polu šulstwa skutkowacych su wčerawšej diskusiji w bróžni Wojerowskeho domu Domowiny wosebity raz spožčili. Dóšło bě k zarjadowanju na iniciatiwu čłona kubłanskeho wuběrka Serbskeho sejma Měrćina Krawca. Přeprosył bě na nje nimo­ Krawca tež župan Domowinskeje župy „Handrij Zejler“ Wojerecy Marcel Brauman. 13 zajimcow je nětko na dwu­apołhodźinske zarjadowanje přišło. Prašenje, na kotrež pytachu wotmołwu, rěkaše: „Budźe serbšćina bórze připóznata rěč na gymnazijach a wyšich šulach Sakskeje?“ Połoženje we Wojerecach tworješe zakład rozmołwy.