Koncertuja na druhim městnje
Radwor. Swój lětni koncert přewjedźe Radworski chór Meja njedźelu, 30. junija, w chłódku štomow na farskej zahrodźe při Radworskej cyrkwi, nic kaž hewak před Starej cyrkwičku. Wot 15.30 hodź. poskića tam swačinu. Koncert započnje so w 16 hodź. Nimo Mejanow wuhotuje program chór Svatobor z čěskeho městačka Sušice pola Plzenja. Wón přijědźe prěni raz do Łužicy. Popołdnjo wuklinči ze zhromadnym spěwom a bjesadu. Organizatorojo wjesela so na bohaty wopyt.
Pokaza tradicionalnu keramiku
Budyšin. Wuměłstwowa historikarka Ophelia Rehor přeprosy jutře, sobotu, na wodźenje po aktualnej wosebitej wustajeńcy wo hornjołužiskej keramice w prěnjej połojcy 20. lětstotka, a to do Muzeja Budyšin. Při tym předstaji wona někotre keramiske wudźěłki z cyłkownje nimale tysac kruchow wopřijaceje priwatneje zběrki mandźelskeju Plewe, kotruž je muzej 2018 darjenu dóstał. Eksponaty su zwjetša pisane burske sudobja z tradicionalnymi dekorami. Wodźenje započnje so w 15 hodź.
Oldtimery přijědu do coowa