Diskusijne koło jako zazběh zjawneje debaty wo změnje serbskeje hymny

Budyšin (SN/bn). Pod hesłom „Su jenož mužojo hódni wěčnoh wopomnjeća?“ wotmě so wčera na žurli Budyskeho Serbskeho domu diskusija wo serbskej hymnje. Na nju přeprošałoj běštej Maćica Serbska (MS) a Serbske Nowiny. Zawodnje zjima kulturny stawiznar dr. Franc Šěn swój w mejskim Rozhledźe wozjewjeny nastawk wo na změny bohatym wuwiću ody Handrija Zejlerja „Na serbsku Łužicu“, originalnje spisaneje w lěće 1827, k oficialnej hymnje serbskeho ludu. Přednošk wujewi, zo bu tekst wjacekróć přebasnjeny a – přewažnje estetiskich přičin dla – přiměrjeny. Předsydka MS dr. Anja Pohončowa rozłoži něhdźe 30 přitomnym, zo bě najstaršemu serbskemu towarstwu kritiski komentar w SN z přičinu, „zahajić diskusiju na zakładźe konkretneho namjeta. Změna měła tak mała kaž móžno być.“ W tak nastatej wersiji njerěka w druhim wjeršu druheje štučki hižo „... Ow, zo bychu z twojeho klina wušli mužojo ...“, ale „... Njech nam z klina twojeho, wuńdu žony, mužojo ...“. Basnica Róža Domašcyna přizna, zo sej originalnu baseń Zejlerja „přewšo česći“.