W Bóšicach bydlaca Serbowka Marija Untchowa kandiduje za Zwjazk 90/ Zelenych k wólbam Budyskeho wokrjesneho sejmika w juniju, kaž tež Sakskeho krajneho sejma w septembrje. Milan Pawlik je so z njej rozmołwjał.
Kak dołho sće hižo politisce aktiwna?
M. Untchowa: Hižo za čas swojeho studija chemije w Mainzu spočatk 2000tych lět sym so na dobro studentow na uniwersiće angažowała, mjez druhim w radźe swojeho fachoweho zwjazka. Pozdźišo, po porodźe swojeho prěnjeho syna, běch w towarstwje „Mother Hood“, kotrež wojowaše tehdy přećiwo ekstremnje wysokim dawkam za swobodnje skutkowace baby, njestronsce politisce aktiwna. Tu sym dialog z politiskimi zastupjerjemi wšěch stron pytała, zo bych situaciju babow a z tym tež maćerjow polěpšiła. Hakle spočatk tutoho lěta sym do strony Zwjazk 90/Zeleni zastupiła.
A čehodla sće so za tutu stronu rozsudźiła?
