Budyšin (SN). Na wólbnych forumach Domowiny „wukristalizowa so, zo njejsu wšitcy kandidaća wo serbskich naležnosćach informowani. Zdźěla kandidatki a kandidaća programy swójskich politiskich stron njeznaja“, zjima předsyda třěšneho zwjazka Dawid Statnik w aktualnej zdźělence. Zdobom zwěsća, „zo so wšě politiske strony serbskemu ludej w swojim wólbnym programje wěnuja – hač na FDP w Braniborskej a AfD w Sakskej.“ We wobsahach pak su wulke rozdźěle: „Ći jedni serbski lud jeničce na kulturu redukuja. Druzy namjetuja konkretne naprawy za polěpšenje situacije, na přikład w palacej so temje šulstwo“, tak Statnik.