Zwjazkowe předsydstwo Domowiny w Slepom so schadźowało

Slepo (SN/MkWj). Zwjazkowe předsydstwo Domowiny je wobzamknyło, přichodnu, 23. hłownu a wólbnu zhromadźiznu narodneje organizacije Serbow dnja 5. apryla 2025 do Budyšina zwołać. Cyłkownje 130 delegatow ma zhromadnje z hosćimi na žurli Serbskeho ludoweho ansambla dotalne dźěło Domowiny bilancować a směrnicy dalšeho dźěła wobzamknyć. Hač do kónca januara maja župy składnosć, delegatow za hłownu zhromadźiznu pomjenować. Čłonojo zwjazkoweho předsydstwa su swoje 18. posedźenje w Slepjanskim Serbskim kulturnym centrumje přewjedli.

Na spočatku rozprawješe županka župy Jakub Lorenc-Zalěski, Diana Maticowa, wo aktualnym połoženju. Župa ma 500 čłonow, kotřiž dźěłaja w šěsć skupinach, dźewjeć zapisanych a pjeć njezapisanych towarstwach.