Na wčerawšim zetkanju Domowiny ze społnomócnjenymi za serbske naležnosće wokrjesow Delnjeje Łužicy a Choćebuza su so tež z přichodom nałožka łapanja kokota zaběrali.

Choćebuz (SN/mb). Heike Apeltowa, regionalna rěčnica Domowiny, zjima diskusiju tak: Nałožki so drje dale wuwiwaja, ale kak, to njesměš wot horjeka postajować. Lětsa chcyše weterinarny zarjad wokrjesa Dubja-Błóta kokotałapanje w Běłej Górje zakazać, doniž njeje krajny rada zakročił prajo: „To je starodawny serbski nałožk a z tym je škitany.“ Rozestajenje pak póńdźe škitarjow zwěrjatow organizacije Peta dla dale. Po zakonju je morjenje zwěrjeća jenož „chutneje přičiny“ dla dowolene. Nic pak za „na zabawu wusměrjene zarjadowanja“, woni na swojej internetnej stronje pisaja.