Gołbin (SN/mb). Župa Delnja Łužica je na wurjadnu hłownu zhromadźiznu do wjesneho domu w Gołbinje přeprosyła. Tam su so wčera nawječor zastupjerjo najwjetšeho regionalneho zwjazka Domowiny schadźowali, zo bychu swojich kandidatow za wólby 7. Rady za naležnosće Serbow w Braniborskej nominowali.
Kaž je nam dźensa regionalna rěčnica Domowiny Heike Apeltowa zdźěliła, je so 47 zastupjerjow skupin a towarstwow župy z 2 600 čłonami, za sydom kandidatow rozsudźiło. Do poslednich wólbow 2019 bě župa šěsć kandidatow nastajiła.
Połdra hodźiny traješe wčerawše zjawne zarjadowanje w přijomnej a konstruktiwnej atmosferje. Wot wšěch kandidowacych předležeše delegatam pisomne předstajenje. Najwjace (45) je za jednaćela Domowiny Marcusa Końcaŕja hłosowało. Jemu sćěhuje ekspertka za kubłansku politiku Delia Münchowa (44). Na třećim městnje steji Dieter Freihoff (37), wjesnjanosta Markojskeje Góle. Dalši nominowani kandidaća su: jednaćel kina Michael Apel z Grodka (36), Birgit Kaufholdowa (33), André Nowak, architekt z Choćebuza (28), a Robert Engel (27).
