Nowy wjesnjanosta Sprjewineho Doła je wčera zastupjerjow Serbow z regiona přijał. Wón drje z Rudnych horow pochadźa, ale so za Serbstwo zasadźuje a při tym rady pomoc přiwza.

Nowa wjes (JK/SN). Marco Beer (njestronjan) je wot lětušeje meje wjesnjanosta gmejny Sprjewiny Doł. Naslěduje Manfreda Heinu, kiž je 28 lět gmejnu nawjedował. Beer znaje gmejnu ze sydom wjeskami jara derje, wšako je tam hižo jako komornik a zarjadniski nawoda wjacore lěta dźěłał. Nětko je so rozsudźił, po teritoriju třeću najwjetšu gmejnu Budyskeho wokrjesa nawjedować. We wjeskach gmejny pěstuja so serbske nałožki a tradicije, tež hdyž so při tym lědma serbsce rěči. W zakładnej šuli we Nowej wsy so hižo serbska wučba njepodawa.