Rozmysluja wo přichodźe „Domu Měrćina Nowaka-Njechorńskeho“

Njechorń (SN/BŠe). Znaty serbski moler a grafikar Měrćin Nowak-Njechorński, zemrěty w lěće 1990, je swójski bydlenski dom w Njechornju Serbam přewostajił. W swojim testamenće je sej přał, zo ma so w domje a ateljeju muzej kaž tež serbske kulturne schadźowanišćo zarjadować. Domowina je zamołwitosć za dom a ležownosć w Njechornju přewzała. Po wobšěrnych dźěłach je so dom w juniju 1999 zjawnosći přepodał. Wo wulkomyslny dar, kotryž dyrbja Serbja zachować, nětko rozmysluja. Škódnik w drjewje tam mjenujcy wulke škody zawinuje. Tež sćěny, předewšěm při kachlach, su mokre. Barba na sćěnach so zdźěla puka. Hladajo na substancu je nuznje wobnowjenje trěbne.

Tohorunja je smjerć Róžy Pinkawineje ze susodneho Worcyna lětsa w septembru swoje slědy zawostajiła. Wona je so štwórć lětstotka swěru wo hosći w domje starała a wědu wo wuznamnym molerju a grafikarju zajimcam sposrědkowała. Pinkawina je tehdy hižo Domowinu a Załožbu za serbski lud wo pomoc prosyła.