Nowe zwjazkowe předsydstwo Domowiny (ZP) je so pjatk popołdnju w Budyskim Serbskim domje a online skonstituowało. Z tym je gremij po hłownej zhromadźiznje swoje wotnětka hač do lěta 2029 trajace dźěło zahajił.

Budyšin (SN/mb). „To tak hišće njejsmy měli“, praješe předsyda Domowiny Dawid Statnik: Hakle loni wuzwolena zapósłanča CDU w sakskim krajnym sejmje Elaine Jenčec sposrědkowa čłonam načolneho gremija třěšneho zwjazka Serbow oficielnu pisomnu gratulaciju. W spisu mjez druhim zwurazni: „Sym přeswědčena, zo wuskutkujeće ze swojim angažementom a swojej rozpalitosću wjele pozitiwneho za serbsku kulturu, naš region a ludźi. Za to přeju Wam trěbnu móc, wotewrjenych partnerow a inspiraciju za přichodne wužadanja.“