SJ Chrósćicy –

HZ Łaz /Běły Chołmc 1:2 (1:0)

Zestawa domjacych: Škoda – L. Zahrodnik, M. Zahrodnik, Mark, Wornar, Graf (80. Mi. Zahrodnik), Hawš, Handrik, Bogusz­ (46. Bjeńš), Matik (62. Rätze), G. Zahrodnik

Njedźelu witachu Chróšćenjo hrajne zjednoćenstwo Łaz/Běły Chołmc při rjanym nalětnim wjedrje na domjacy trawnik. Konstelacija do hry bě jasna. Domjacy chcychu na kóždy pad přećiwo poslednjemu tabulki dypkować. Tola wosebje mustwa z delnjeje połojcy tabulki Chróšćanam stajnje ćežko činja.

Hosćićeljo wot spočatka sem partiju kontrolowachu a bul derje w swojich rjadach dźeržachu. Hač krótko před šěsnatku so husto hdy derje přesadźichu. Tola zwjetša njenamakachu přećiwo hłuboko stejacemu škitej puć k wrotam. Tuž so hra mjez šěsnatkomaj wotmě a wobaj cyłkaj sej mało šansow wuhraštej. Krótko do połčasa domjacy cyłk skónčnje wyskaše­. Po rjanej flance Clemensa Handrika­ z praweho křidła hłójčkowaše Gabriel­ Zahrodnik kulowatu kožu k 1:0 w 36. min. do wrotow.