VfL Pirna Copitz 07 –
ST Viktoria Worklecy 3:1
(22:25, 29:27, 25:10, 25:23)
Na předposlednim hrajnym dnju sakskeje klasy wopytachu Worklečanscy wolejbulisća mustwo, kotrež steji na druhim městnje hrajneje tabulki, w Pirnje. Bě to třeća ćežka wonkowna hra zašłych tydźenjow. Přiwšěm běchu Viktorianojo kruteje wole, nochcychu dypki bjez boja wotedać.
Byrnjež třo stajni hrajerjo pobrachowali, móžachu dźakowano šěrokemu dorostowemu kadrej z 12 hrajerjemi dojěć. Mjez nimi bě Benedikt Šołta, kotryž swjećeše na tutym dnju swoje 18. narodniny. Tež stajny přistajer Jakub Bobka njebě pódla a tak dyrbješe Marcel Rjelka zaskočić. Wón spjelni tutón nadawk suwerenje a swojim nadběhowarjam přeco zaso perfektnje přihrawaše.
Tak bě prěnja sadźba hač do 17:17 wurunana. Po tym wuhrachu sej hosćo samo předskok dweju dypkow. Za poslednjej nadaći poda so Józef Šnajder na zakładnu liniju. Blok zamóchu z klewernej změnu hišće raz wo někotre centimetry zesylnić, tak poradźi so jim mała sensacija a přewinychu faworita 25:22.
