Farar a serbski superintendent Jan Malink swjatočnje rozžohnowany
Budyšin (SN/bn). „Wón dyrbi rosć, ja pak dyrbju woteběrać.“ Tele bibliske hesło Jana Křćenika bě sej farar Jan Malink wuzwolił, jako 3. adwenta 1983 słužbu měšnika nastupi. Po 37 lětach poda so wón nětko na wuměnk. Zdobom zakónči so jeho skutkowanje jako serbski superintendent – zastojnstwo to, kotrež je 17 lět dołho wukonjał. Z wčerawšej swjatočnej Božej słužbu w połnje wobsadźenej Budyskej tachantskej cyrkwi rozžohnowa so Malink z wosadnymi kaž tež rowjenkami, podpěraćelemi a přećelemi.
Na zakładźe swojeho ordinaciskeho hesła nawjaza Jan Malink na swoje „prěnje prědowanje, kotrež najskerje předobre njebě. Raz je mi žona z wosady rjekła, zo drje su moje prědowanja biblisce cyle w porjadku, dźensniši wid pak jej přiwšěm pobrachuje. A wona měješe prawje. Zaznawanje je proces. Dźakuju so za rjany čas – wostudźił so nihdy njejsym. Dźakuju so za wšo, štož smědźach přijimać, dźakuju so za wšo, štož je so přijimało. Dźakuju so za rozrost hnady – a to je žro słowow Jana Křćenika: Chryst ma rosć, swójske ‚ja‘ so pomjeńšić.“
