Berlin (dpa/SN). Kupcy elektroawtow dóstanu přichodnje premiju 4 000 eurow. To je zwjazkowe knježerstwo dźensa wobzamknyło. Premija płaći za ryzy elektriske awta. Za nakup hybridneho awta wu­płaća „wobswětowy bonus“ 3 000 eurow. Za spěchowanski­ program nałoža 1,2 miliardźe eurow. Dalše 300 milionow chcedźa za natwar 15 000 nowych stacijow za nabiwanje­ baterijow elektroawtow wudać. Předsyda FDP Christian Lindner naprawu knježerstwa kritizuje, dokelž „wjele płaći a lědma něšto wunjese“.

Tarifowe dojednanje přewzate

Kamjenica (dpa/SN). Tarifowy konflikt w sakskej metalowej a elektroindustriji je zakónčeny. W třećim jednanskim kole su so dźěłodawarjo a zastupnicy dźěłarnistwa IG metal dźensa w Kamjenicy dojednali, zo minjeny tydźeń w Sewjerorynsko-Westfalskej dojednany kompromis přewozmu. Přistajeni dóstanu 4,8 procentow wjace pjenjez kaž tež jón­krótny připłatk 150 eurow, zdźěla dźěłarnistwo. Po słowach jeho rěčnika je tole­ „akceptabelny kompromis“.

Moskwa poskića sobudźěło

Brüssel/Flensburg (SN/MiR). Narodne mjeńšiny su wospjet namołwjene, naprašnik wupjelnić. Tónkróć wyša komisarka za narodne mjeńšiny Organizacije za wěstotu a zhromadne dźěło w Europje (OSCE) Astrid Thors zastupjerjow mjeńšin k tomu pohnuwa. Wona pyta za přikładami, kotrež potencial mjeńšin jako mostytwarcow mjez statami pokazuja. „Zaměr tohole naprašowanja je, na dobre přikłady skedźbnjeć a je tak drudźe nałožować“, wuswětla nawodnica mjeńšinoweho sekretariata w Berlinje Judith­ Wałdźic. Hač do 31. meje je hišće składnosć, podaty formular w interneće wupjelnić. Na stronje www.minderheiten­sekretariat.de/aktuelles je to móžno.

Němscy politikarjo debatuja wo přichodźe renty

Berlin (SN/MkWj). W přichodnym boju k wólbam Němskeho zwjazkoweho sejma 2017 ma po woli SPD diskusija wo rentach wulku rólu hrać. Hłowna přičina je poněčim spadowacy niwow renty, kotryž­ móhł přichodnym generacijam chudobu w starobje wunjesć. Měnjenja wo tym, kak hodźało so tomu zadźěwać, pak su rozdźělne.

Zapósłanča CDU w zwjazkowym sejmje Marja Michałkowa je sej toho wědoma, zo je tuchwilny system rentow wohroženy. Wona skedźbnja na to, zo wuměnkarjo dźensa přerěznje 19,3 lěta rentu dóstawaja, 1995 bě to hišće 15,8 lět. Woteběrace renty njejsu po dźěłapołnym žiwjenju za wšitkich spokojace. „Rozji­mujemy tuchwilu, kak na tele wuwiće reagować. Jedna z móžnosćow je flexi-renta. Wona měła ludźi pohnuć dlěje dźěłać. Prawniske wuměnjenja, sej wjace zasłužić­ móc, chcemy widźomnje wo­lóžić“, rjekny Michałkowa na naprašo­wanje SN.