Jednanja dotal bjez wuslědka
Podstupim (dpa/SN). W zwadźe wo zwyšenje mzdow za wjace hač milion přistajenych zwjazkowych krajow prócuja so dźěłarnistwa a dźěłodawarjo wo rozrisanje. Kónc tydźenja stej wobě stronje w Podstupimje jednałoj, tola bjez wuslědka. Wčera wječor zdźělichu, zo chcedźa z jednanjemi dźensa pokročować. „To drje hišće traje“, rjekny šef dźěłarnistwa ver.di Frank Werneke. Zdobom pak wšitcy wobdźěleni potwjerdźichu, zo chcedźa so na kóždy pad dojednać.
Koaliciske zrěčenje předstajili
Berlin (dpa/SN). Dobrej měsacaj po wólbach Berlinskeho Domu zapósłancow chcychu SPD, Zeleni a Lěwica dźensa zhromadne koaliciske zrěčenje předstajić. Potom ma tež rozdźělenje ministerstwow jasne być. W křesle šefa sedźi přichodnje krajna předsydka SPD a bywša zwjazkowa swójbna ministerka Franziska Giffey (SPD). Kónc tydźenja běchu społnomócnjeni třoch stron wo rozdźělenju ressortow wuradźowali.
Poručenja žurnalistam
We wobłuku statow Visegrádskeje štyrki su so dźensa w madźarskej ...
Pacientow přepołožili
Mnichow (dpa/SN). Při dotal najwjetšej akciji přepołoženja pacientow intensiwnych stacijow su kónc tydźenja nimale 50 ćežko schorjenych z Bayerskeje, Durinskeje a Sakskeje do druhich zwjazkowych krajow dowjezli. Z přepołoženjom chcychu wot štwórteje žołmy koronapandemije wosebje potrjechenym zwjazkowym krajam pomhać, kotrež bědźa so z přećeženymi intensiwnymi stacijemi chorownjow. Lěkarjo wopisuja połoženje tam jako dramatiske.
Jeničce w Bayerskej leži po informacijach intensiwneho registra wjace hač tysac na covid-19 schorjenych na intensiwnych stacijach. Połojca z nich trjeba nastroj k zastaranju z kislikom. Mjeztym wo tym rozmysluja, pacientow tež do wukraja přepołožić, njedyrbjeli-li kapacity w Němskej hižo dosahać. Ze Sakskeje su cyłkownje 14 pacientow do druhich zwjazkowych krajow dowjezli.
Omikron starosći
Berlin (dpa/SN). Chětro starosćiwje zhladuje Berlinski wirologa Christian Drosten na nowu formu koronawirusa omikron. „Wokomiknje so jara starosću“, rjekny wón wčera w sćelaku ZDF. Wo nowym wirusu njeje hišće wjele znate. Tuž měło so dalše wuwiće wočaknyć. Znate pak je, zo su tež ludźo potrjecheni, kotřiž maja chorosć hižo za sobu.
Přichodne zwjazkowe knježerstwo SPD, FDP a Zelenych je mjeztym připowědźiło, zo chce planowany krizowy stab koronawirusa dla hižo přichodne dny dźěłać započeć. Gremij nawjedować ma generalny major Carsten Breuer, kaž předsyda FDP Christian Lindner připowědźi.
Nowy premier Čěskeje powołany
Praha/Lány (dpa/SN). Liberalno-konserwatiwny Petr Fiala je nowy ministerski prezident Čěskeje republiki. 57lětny je wčera na hrodźe Lány pola Prahi w přitomnosći prezidenta Miloša Zemana hamtsku přisahu złožił. Dokelž běchu Zemana njedawno pozitiwnje na koronawirus testowali, sedźeše 77lětny prezident za přewidnym wotdźělenjom.
Rozžohnowace so knježerstwo dotalneho ministerskeho prezidenta Andreja Babiša wostanje hač k pomjenowanju noweho kabineta jednaćelsce w zastojnstwje. Z pomjenowanjom nowych ministrow liča najzašo srjedź decembra. Fiala chce zwjazk pjeć stron nawjedować, kotremuž přisłušeja nimo jeho Demokratiskeje wobydlerskeje strony (ODS) tež křesćanscy demokraća a Piraća. Zhromadnje běchu wone při wólbach parlamenta spočatk oktobra 108 z cyłkownje 200 mandatow w Domje zapósłancow zdobyli. „Stejimy před ćežkimi časami“, rjekny Petr Fiala při podpisanju koaliciskeho zrěčenja před třomi tydźenjemi. ODS wón mjeztym wosom lět nawjeduje.
Mjeńšiny wobkedźbowane dosć?
Přihłosowanje a kritika k wuprajenjam w koaliciskim zrěčenju
Flensburg/Berlin (SN). W koaliciskim zrěčenju noweho knježerstwa SPD, FDP a Zelenych zakótwjenej wotrězkaj nastupajo mjeńšiny Federalistiska unija europskich narodnych mjeńšin (FUEN) zasadnje wita. Lěwica pak so kritisce wupraja.
W koaliciskim zrěčenju mjez druhim rěka: „Narodne mjeńšiny – danska mjeńšina, friziska ludowa skupina, němscy Sintojo a Romojo kaž tež serbski lud – su samozrozumliwy dźěl našeje mnohostronskeje towaršnosće.“ (str. 118) „Iniciatiwu Minority SafePack proaktiwnje podpěrujemy a ju w Němskej přesadźimy. Projekty k zachowanju a wuwiću mjeńšin, jich rěče a kultury dale wutwarimy.“ (str. 122)
„Jako třěšny zwjazk a zastupnica awtochtonych a narodnych mjeńšin witamy zwjeselacy wurjadne wuznaće k mjeńšinam, rěčnej mnohotnosći a k planowanemu rozšěrjenju zasadźenja zwjazkoweje republiki. Za škit narodnych mjeńšin w Europje je bytostne, zo su štyri připóznate narodne mjeńšiny w zrěčenju wuraznje mjenowane“, piše prezident FUEN Loránt Vincze w oficialnym stejišću organizacije mjeńšin.
Njepředstajomne
To a tamne (29.11.21)
Spěšnje hišće swojej přewodźerce domoj dowjezć chcyše 38lětny pjany šofer wosoboweho awta, po tym zo bě jeho policija w Hagenje zadźeržała. Muž rjekny, zo bě ze žonomaj na party a zo je jenož jedne piwo pił. Alkomat zastojnikow pak pokaza 1,67 promilow. Jako chcychu jeho sobu na stražu wzać, muž praji, zo wšak chcył žonje hišće domoj dowjezć. Z toho ničo njebu: Policisća wzachu jemu klučik.
Hižo třeću nóc za sobu w korčmje přenocować dyrbja wopytowarjo puba na sewjeru Jendźelskeje. Dotal njeje jasne, hdy budźe dróha k wotležanemu hosćencej w narodnym parku Yorkshire Dales zaso swobodna. Sylny sněhowy wichor bě něhdźe 60 hosći překwapił a wobchadny chaos zawinił. K jědźi maja hišće dosć, korčmarka měnješe. Hosćo zaběraja so ze wšelakimi hrami. Alkohol pak syda hakle popołdnju po třoch.
Twarske dźěła w SLA klětu zakónča
Załožbowy etat za lěto 2022 je schwaleny. Lětsa zahajene pomjeńšenje personalnych deficitow w serbskich institucijach klětu dale powjedu, kaž bě srjedu na nowinarskej rozmołwje zhonić.
Budyšin (SN/at). Posedźenje załožboweje rady minjenu wutoru bě prěnje po 30. róčnicy wutworjenja Załožby za serbski lud 19. oktobra 1991 we Łazu. Předsyda parlamentariskeje přirady, zapósłanc Sakskeho krajneho sejma Marko Šiman, poda tam zarys stawiznow załožby. Wšako njeje wjetšina nětčišich radźićelkow a radźićelow jeje započatki sobu dožiwiła. Składnostnje róčnicy je politisko-parlamentariski wječork w Berlinje předwidźany, podšmórny předsydka załožboweje rady Susann Šenkec. Wo konkretnym terminje pak wona ničo njerjekny, dokelž zdawa so aktualne pandemiske połoženje najwjetše haćidło być.
Přepołoža ludźi z lětadłom
Berlin (dpa/SN). Němske wojerske lětarstwo je dźensa započało, na koronawirus intensiwnje lěkowanych pacientow přepołožić. Za to je Airbus MedEvac po informacijach powěsćernje dpa na bayerskim lětanišću Memmingen přizemił a wottam pacientow do Münstera-Osnabrücka w Sewjerorynsko-Westfalskej transportował. Zwjazkowa wobora ma dwě tajkej lětadle. Tak móža pacientow w běhu krótkeho časa po wšej Němskej rozdźělić, hdyž su chorownje wućežene.
Hotuja so na triažu
Berlin (dpa/SN). Hladajo na zdźěla dramatiske połoženje w chorownjach koronawirusa dla je předsyda swětoweho zwjazka lěkarjow Frank Ulrich Montgomery alarmowany: „Hotujemy so wšitcy na triažu“, rjekny wón nowinarjam. Lěkarjo wšitko činja, zo bychu tajkemu surowemu rozsudej zadźěwali. „Přiběracych ličbow dla pak dyrbja so na to přihotować.“ Triaža rěka, zo dyrbja medicinarjo pobrachowacych móžnosćow dla rozsudźić, komu najprjedy pomhaja.
Južna Afrika wirusowa kónčina
