Bamž Franciskus Bidena přijał
Merz z najlěpšimi wuhladami
Rybarska zwada so přiwótřa
London (dpa/SN). W zwadźe mjez Londonom a Parisom nastupajo prawa łójenja rybow w Doverskim přeliwje je britiske knježerstwo francosku wulkopósłanču do wonkowneho ministerstwa skazało. Wulkopósłanča ma „přesłapjace a nadměrne hroženja přećiwo Wulkej Britaniskej rozkłasć, zdźěli britiska wonkowna ministerka Liz Truss. Do toho bě Francoska britisku rybarsku łódź pozdatnje pobrachowaceje licency dla sćazała.
Zwada rybarstwa dla traje hižo dosć dołho. Prašenje je, kelko wukrajnych rybarjow smě po brexitće hišće w britiskich mórskich kónčinach ryby łójić. Tole bě jedne z najwobćežnišich prašenjow při jednanjach wo wikowanske zrěčenje mjez Britami a EU. Temu wobjednawaja chětro emocionalnje, wužiwajo prastare předsudki druhemu krajej napřećo.
Francoske knježerstwo bě w tym zwisku připowědźiło, zo njesmědźa wot 2. nowembra britiske rybarske łódźe wšelake francoske přistawy wjace wužiwać. Nimo toho chce Francoska wěstotu britiskich rybarskich čołmow pruwować. Tež britiske nakładne awta chcedźa krućišo kontrolować hač dotal.
To a tamne (29.10.21)
Samlutki z měšćanskej železnicu po puću był je dakl w Mnichowje. Pos steješe w Grafingu pola Mnichowa sam na nastupišću a zalěze do ćaha, kiž jědźeše do směra na nutřkowne město. Pasažěram dakl napadny. Woni zawołachu policiju. Zastojnicy psa z picu zastarachu. Kaž so wukopa, bě sej 49lětny wobsedźer w ćahu wusnył. Tuž bě psyk sam z ćaha wustupił a z druhim dale jěł. Po dlěšim pytanju muž psa pola policije namaka.
Z pomocu interneta dźěćo porodźiła je 17lětna młodostna w Indiskej, po tym zo bě sej pola Youtube informaciski widejo wobhladała. Samodruhosć bě před staršimaj zatajić móhła. Wonaj zhoništaj wo wnučku hakle, jako słyšachu ze stwy dźowki žałosćenje ćěšenka. Policija je mjeztym 21lětneho nana dźěsća zajała, dokelž měješe seks z njepołnolětnej, štož je w Indiskej zakazane.
Debatuja wo zakazu LGBT
Waršawa (dpa/SN). Pólski sejm zaběra so dźensa wječor prěni króć z naćiskom zakonja, kiž demonstracije za runostajenje homoseksualnych zakazuje. Naćisk za změnu zakonja wo zhromadźowanju zapodałoj stej aktiwistka organizacije pro-life Kaja Godek a Załožba za žiwjenje a swójbu. Změna předwidźi, zo njesmědźa zjawne zarjadowanja zaměr měć, „mandźelstwo jako zwjazk muža a žony do prašenja stajeć“. Zakazać chcedźa demonstracije hibanja LGBT – lesbow, homoseksualnych, biseksualnych a dźenderow.
Wadźa so rybarjenja dla
London/Paris (dpa/SN). Zwada mjez Francoskej a Wulkej Britaniskej wo rybarjenju w Doverskim přeliwje so dale přiwótřa. Francoska mórska straža je britisku rybarsku łódź pobrachowaceje licency dla sćazała a do přistawa přewodźała. Wobsadce hrozy pjenježna pokuta a sćazanje nałójenych rybow. Po brexiće bě Francoska připowědźiła, zo trjebaja britiscy rybarjo wosebitu licencu za rybarjenje w potrjechenej kónčinje.
Meier přećiwo namjeznej muri
Při protestach přećiwo wysokim płaćiznam bencina a diesela je w ...
Ruska sćele wjace płuna
Biden po puću
Bamž planuje jězbu do Kanady
Rom (dpa/SN). Bamž Franciskus wo tym rozmysluje, přichodne lěta Kanadu wopytać. Kanadiska biskopska konferenca jeho přeprošuje, zo by proces wujednanja z indigenymi wobydlerjemi sewjeroameriskeho kraja pohonjował. Bamž je na to swoju zwólniwosć signalizował do Kanady přijěć, „na terminje, kiž ma pak so hakle namakać“, wčera we Vatikanje zdźělichu.
W Kanadźe běchu minjene měsacy wospjet powostanki dźěćacych ćěłow a njewoznamjenjene pohrjebnišća w susodstwje bywšich internatow za dźěći indigenych ludow namakali. Tójšto z tutych institucijow bě swój čas w nošerstwje katolskeje cyrkwje. Namakanki běchu zludanje a rozhorjenosć zbudźili. Fachowcy UNO za čłowjeske prawa běchu sej na to wot Kanady a Vatikana wobšěrne wujasnjenje žadali. Ministerski prezident Justin Trudeau bě bamža namołwjał, do Kanady přińć a so zamołwić. Kanadiscy katolscy biskopja su hladajo na wočiwidne njeskutki hakle njedawno zjawnje wo wodaće prosyli.
„Pandemija njeje hišće nimo“
Sakski ministerski prezident přećiwo zběhnjenju nuzoweho stawa
Drježdźany (dpa/SN). Sakski ministerski prezident Michael Kretschmer (CDU) je sej wěsty, zo njeje pandemiske połoženje narodneho rozměra hišće nimo. „Nawopak, wone so runje zaso sylnišo a strašnišo wuwiwa“, rjekny knježerstwowy šef powěsćerni dpa, spřećiwjejo so tak zwjazkowemu ministrej za strowotnistwo Jensej Spahnej (CDU). Tón bě so minjene dny za to wuprajił, po 25. nowembru wšoněmske nuzowe połoženje dale njepodlěšić.
„Hižo w nalěću je so tutón zmylk stał. Politika bě přećiwo radźe wědomosće škitne naprawy najebać přiběraceje ličby infekcijow zběhnyła. Sćěh toho běštej zwjazkowe nuzowe borzdźidło a lockdown w nalěću. Štóž chcył sej normalitu wunuzować, jej snano samo zadźěwa“, Kretschmer argumentowaše. Tele dny móhli snano hišće wo tym rozmyslować, naprawy na rizikowu skupinu nješćěpjenych wobmjezować. Za něšto tydźenjow tež tuta móžnosć wjace njewobsteji.
