To a tamne (26.10.21)
Z hajzlowej papjeru a kórkowymi škleńcami je překlepana rentnarka we Würzburgu wobšudnikow zjebała. Tući běchu ju zazwonili a sej pjenjezy žadali, dokelž je jeje dźowka pječa ćežke wobchadne njezbožo zawinowała. Žona pak scyła žanu dźowku nima. Najebać to wona přilubi, zo přepoda pjenjezy a debjenki. W tobole, kotraž wona kurěrej přepoda, pak běchu jenož papjera a škleńcy. Mjeztym informowana policija podhladneju w starobje 15 a 22 lět zaja.
Wobsadkam dźewjeć policajskich awtow je so wčera poradźiło, ćeknjeneho młodeho byka popadnyć. Zwěrjo bě w nocy njedaloko badensko-württembergskeho Lörracha po puću a měrješe so na awtodróhu 98, kotruž dyrbjachu tohodla nachwilnje zawrěć. Zhromadnje z wobsedźerjom, hajnikom a pomocnikami móžachu 300 kilo ćežkeho byka popadnyć.
Zetka so znowa z chudymi
Vatikan (B/SN). W nowembru wobdźěli so bamž Franciskus wospjet na swětowym dnju chudych w Assisiju. Tónle dźeń je wón před pjeć lětami zawjedł. Lětsa chce so priwatnje z 500 chudymi a potrěbnymi ludźimi ze wšelakich dźělow Europy w bazilice Santa Maria degli Angeli w měsće swjateho Franca zetkać. W bazilice je srjedźowěkowska porciunkulska kapałka, w kotrejž je Franc Assisiski 1226 zemrěł. Zetkanje steji pod hesłom: „Jězus njesteji jenož na stronje chudych, ale dźěli z nimi tež samsny dóńt.“ Bamž tuž namołwja, zo móžemy hłód přewinyć, hdyž swoje zadźerženje přetrjeby dla změnimy.“
Zastupjerjow cyrkwjow přijał
Laschet zastojnstwo złožił
Düsseldorf (dspa/SN). Armin Laschet (CDU) je dźensa swoje zastojnstwo jako ministerski prezident Sewjerorynsko-Westfalskeje złožił. Prezident krajneho sejma André Kuper přepoda přichodnemu zapósłancej zwjazkoweho sejma wopismo wo zakónčenju zastojnstwa. Laschet wostanje komisarisce ministerski prezident. Zajutřišim, srjedu, chcedźa Hendrika Wüsta (CDU) za noweho ministerskeho prezidenta kraja wuzwolić.
Spahn za kónc nuzoweho stawa
Berlin (dpa/SN). Zwjazkowy minister za strowotnistwo Jens Spahn (CDU) ma skónčenje tak mjenowaneho epidemiskeho połoženja narodneho rozměra koronapandemije dla za woprawnjene. W sćelaku ZDF wón rjekny, zo móhli wot zwjazkoweho sejma wukazany wuwzaćny staw skónčić, dokelž je mjeztym 80 procentow dorosćenych přećiwo wirusej šćěpjenych. Tema je tuchwilu přičina raznych diskusijow, dokelž ličby infekcijow dale přiběraja.
Liči z infekcijemi w šulach
Zwjazkowy prezident Frank-Walter Steinmeier je sej dźensa zhromadnje ...
Kretschmer: Zrěčenje dodźeržeć
Ćěkańcow spěšnišo rozdźělić
Braniborska chce zhromadne dźěło ze Zwjazkom polěpšić
Berlin/Frankfurt n. W. (dpa/SN). Wo planowanym spěšnišim rozdźělenju ludźi, kotřiž na njedowolene wašnje z Běłoruskeje přez Pólsku do Němskeje přińdu, chcedźa prawdźepodobnje w prěnjej połojcy nowembra rozsudźić. Kaž rěčnik zwjazkoweje policije zdźěli, tole tuchwilu přihotuja. W tym zwisku chcedźa kapacity zaměstnjenja rozšěrić. Planowane je nimo toho, za prěnjotne zaměstnjenje tepjene rumnosće přihotowane měć. Zastojnicy maja ze zwjazkowym zarjadom za migraciju a ćěkancy hromadźe dźěłać, kiž so wo rozdźělenje ćěkancow na druhe zwjazkowe kraja stara. Tuchwilu wšitkich ludźi, kotřiž z Běłoruskeje do Braniborskeje přińdu najprjedy raz w domje za prěnjotne zaměstnjenje w Eisehüttenstadtće registruja. Při tym dźe wo wěstotne přepruwowanje, wo koronatest a wo zastaranje ludźi. Hakle pozdźišo ćěkancow na druhe zwjazkowe kraje rozdźěleja.
Kotre rěče k nam słušeja?
To a tamne (25.10.21)
Hižo poł hodźiny po kradnjenju awta je policija w sewjerorynsko-westfalskim Bestwigu wobsedźerjej wóz zaso wróćić móhła. Zastojnicy wuhladachu awto na zwjazkowej dróze 480, po tym zo bě jich centrala wo kradnjenym awće informowała. Šofer spyta ćeknyć, dyrbješe pak po krótkej honjeńcy bjezwuhladnosć dowidźeć. 58lětneho zajachu. Wón dyrbi so padustwa, smalenja a jězdźenja bjez jězbneje dowolnosće dla zamołwić.
„Frizerskeho termina dla“ je šoferka wosoboweho awta městno njezboža w Regensburgu wopušćiła, bjez toho zo by so wo zranjenu wužiwarku rolera starała. 31lětna bě při zaparkowanju za njej jěducy roler přewidźała a by 21lětnu žonu bjezmała přejěła, kotraž bě při borzdźenju padnyła. Na to 31lětna z přispomnjenjom, zo dyrbi k frizerej, wotjědźe. Wona dyrbi nětko ze skóržbu ćeknjenja po njezbožu dla ličić.
Dalši protest klimy dla
Berlin (dpa/SN). Dźeń po zahajenju koaliciskich jednanjow SPD, Zelenych a FDP je hibanje Fridays for future dźensa swoje žadanja nastupajo lěpši škit klimy potwjerdźiło. Ćežišćo akcije bě Berlin. Tam zhromadźichu so aktiwisća z cyłeje Němskeje. Pod hesłom „Wy njedaće nam žaneje hinašeje móžnosće“ ćehnjechu demonstranća wot Braniborskich wrotow do knježerstwoweje štwórće. Policija rěčeše wo 10 000 wobdźělnikach.
Hałza lokomotiwnika moriła
Templin (dpa/SN). Při wčerawšim sylnym wichoru je njedaloko Templina w Braniborskej hałza lokomotiwnika zarazyła. Muža dowjezechu zranjeneho do chorownje, hdźež wón dźensa rano wudycha. 50lětny bě wčera připołdnju z ćahom zastać dyrbjał, zo by zhromadnje z kolegu hałzy na kolijach rumował, kotrež dalejězbu haćachu. Při tym bu sam wot wulkeje hałzy trjecheny.
Witaja přilubjenje Bidena
