Fantomowy wobraz muža wozjewili
Dźensa prěni raz wuradźuja
Nowy zakoń wo kóncu wudobywanja brunicy nastupajo liča z ćežemi
Berlin/Choćebuz (dpa/SN). W zwjazkowym sejmje rozjimuja zapósłancy dźensa na prěnim wuradźowanju naćisk zakonja wo zakónčenju wudobywanja brunicy a zahaja parlamentariske wothłosowanje. Koncern Łužiska energija a milinarnje (LEAG) wočakuje w zwisku ze zakonjom wulke financielne poćeženja. Tak nastanu kóšty, dokelž dyrbja přistajenych w běhu krótkeho časa pušćić. Dale pak je wjac pjenjez trěbnych, zo móhli kónčiny wokoło brunicowych jamow za hinaše wužiwanje přihotować. Wuhlowe jamy dźě hižo swój planowany geologisce optimalny kónčny staw njedocpěja. Nimo toho změje předewzaće dźeń a mjenje dochodow, zdźěli nawoda financneho wobłuka pola LEAG Markus Binder němskej powěsćerni dpa. Koncern trjeba přidatne inwesticije, zo móhł ludnosć pod nowymi ramikowymi wuměnjenjemi z milinu a ćopłotu zastarać.
Doba znapřeći- wjenja nimo
Grünheide (dpa/SN). Doba zapodaća znapřećiwjenjow nastupajo twornju koncerna Tesla w Grünheidźe pola Berlina je so wčera skónčiła. Po nazhonjenju rěčnicy wobswětoweho ministerstwa Frauki Zelt runje w poslednich hodźinach a mjeńšinach wjele listow dochadźa. Hač do wčerawšeho popołdnja je tak 270 znapřećiwjenjow dóšło. Tež ći wobydlerjo, kotřiž su hač do poslednjeje mjeńšiny čakali, njetrjebaja so starosćić, zo njebudu jich pokazki w zwisku z přepytowanjom wobswětoweje znjesliwosće wobkedźbowane.
Mnohe pokiwy nastupajo wodu, lěs, přirodoškit a wobchad běchu dóšli. Jednotliwe temy budu nětko do wěstych wobłukow rozrjadowane a spřihotowane za termin 18. měrca w Erkneru, hdźež chcedźa je rozjimać. Tam smědźa so potom jeno ći wobydlerjo a zwjazki wuprajić, kotřiž su so pola ministerstwa přizjewili.
Hač do kónca měsaca liči ministerstwo z prěnim zarywom za fabriku. Poslednje dowolnosće maja w běhu lěća předležeć. Hižo klětu wosrjedź lěta chce Tesla w Grünheidźe 500 000 elektro-jězdźidłow typa Model 3 a Y a dalše twarić započeć.
To a tamne (06.03.20)
Z wudu je sej paduch w awstralskim Melbournje wosebitu debjenku přez dźěru wukładneho wokna wobchoda „popadnył“. Dokelž njebě z małkej wudu wuspěšny, sej spěšnje wulku wobstara. Po třoch hodźinach měješe złoćany medaljon skónčnje na hóčce. Policija je drje sej akciju na nahrawanym pasku wobchoda wobhladała, pakostnika w treningowych cholowach pak dotal hišće nima. Wosebje drohotny wšak medaljon njeje, přiwšěm je šef wobchoda zludany. Wšako njeje so ani alarm zaswěćił.
Nuznikowa papjera je hladajo na wupřestrěće corona-wirusa tež w Awstralskej chětro požadana twora. Lokalna nowina je sej tuž žort dowoliła a wčera wosom prózdnych ekstrastronow aktualnemu wudaću připołožiła, z kotrychž móža sej ludźo papjeru přitřihać. „Nimaće žanu hajzlowu papjeru? NT News so wo was stara, a to z limitěrowanej ediciju nuznikowych nowinskich łopjenow“, nowina k tomu pisa.
Burja su sej přezjedni
Wčera w Smochćicach hižo z frakciju CDU wo wjace podpěrje diskutowali
Smochćicy (CS/SN). Ratarjo w Sakskej maja syte. Tež dźensa běchu z traktorami zaso w Drježdźanach, zo bychu tam krajnemu knježerstwu swoju situaciju signalizowali. Hižo wčera bě frakcija CDU sakskeho sejma za stajne blido do Smochčanskeho Domu biskopa Bena prosyła a z něhdźe 60 ratarjemi z Hornjeje Łužicy, ale tež z Mišnjanskeje kónčiny rěčała. Mjez přitomnymi běchu ratar Georg Ludwig von Breitenbruch, kiž je zdobom městopředsyda frakcije CDU, wiceprezident sakskeho burskeho zwjazka Tobias Pelz kaž tež ratar a skótny lěkar Hagen Stark, zastupowacy zjednoćenstwo „Wjesne kónčiny zwjazuja“.
Strach chutnje dosć njebrali
Berlin (dpa/SN). Prezident zwjazkoweho sejma Wolfgang Schäuble (CDU) žada sej wjace zasadźenja ze stron stata hladajo na bój přećiwo prawicarskemu terorej w Němskej. Nadpad w Hanauwje z dźesać smjertnymi woporami žada sej předewšěm sprawne přiznaće stata, zo njeje strach chutnje dosć brał. Z prawniskimi srědkami měł radikalne syće wotkryć a je dospołnje rozbić. Tež zwjazkowy prezident Frank-Walter Steinmeier je dźensa na debatu zwjazkoweho sejma přišoł.
Seehofer ma swědk być
Berlin (dpa/SN). Zwjazkowy nutřkowny minister Horst Seehofer (CSU) ma prawdźepodobnje w aprylu jako swědk w přepytowanskim wuběrku zwjazkoweho sejma nastupajo zwrěšćenu mawt wustupować. To chcyše wuběrk na swojim dźensnišim posedźenju wobzamknyć. Dźensa maja zastupjerjo hospodarskeho, wobchadneho a justicneho ministerstwa před wuběrkom rěčeć. CSU bě w koaliciskim zrěčenju z lěta 2013 mawt jako žadanje přetłóčiła.
Šule zawrěć njetrěbne
Durinske knježerstwo nětko dźěła
Erfurt (dpa/SN). Dźeń po wuzwolenju noweho durinskeho ministerskeho prezidenta Boda Ramelowa (Lěwica) započa mjeńšinowe knježerstwo Lěwica, SPD a Zelenych dźensa dźěłać. Parlament, kotryž hač do jutřišeho wuradźuje, ma wobšěrny program cyłkownje 30 dnjowym dypkow zmištrować.
Knježerstwo – wone ma w krajnym sejmje jenož 42 z cyłkownje 90 městnow – trjeba štyri hłosy frakcije CDU abo FPD, chce-li wo něčim rozsudźić, štož budźe přichodnje wulke wužadanje. „Nadźijam so podpěry demokratiskeju frakcijow w sejmje“, premier Bodo Ramelow zwurazni. Zo móhli scyła štyri tydźenje trajacu krizu w Durinskej přewinyć, su so Lěwica, SPD a Zeleni z frakciju CDU na stabilitne dojednanje dorozumili, kotrež je časowje wobmjezowane a so na projekty poćahuje. Předewšěm dźe tu wo krajny etat za lěto 2021, hdźež dźe wo inwesticije za komuny. Inwesticiski paket chce krajny sejm jutře rozjimać.
Noweho ministerskeho prezidenta su wčera w třećim wólbnym kole wuzwolili, za čož bě jenož hišće jednora wjetšina hłosow zapósłancow trěbna.
Sakska ma deficit
Choćebuz/Drježdźany (dpa/SN). Situacija mało wody w rěkach na juhu Braniborskeje je so po informacijach tamnišeho krajneho wobswětoweho zarjada stabilizowała. Zběrnikaj w Grodku (Sprjewja-Nysa) a Bórkhamoru (Hornja Łužica) matej tuchwilu samo trochu wjace wody, zdźěli rěčnik krajneho zarjada Thomas Frey powěsćerni dpa. Wuliwy Sprjewje, Čorneho Halštrowa a Łužiskeje Nysy pak docpěwaja po słowach Freyja jenož 50 do 75 procentow přerězneje měrcowskeje hódnoty. Pobrachowacy sněh so lětsa wuskutkuje.
To a tamne (05.03.20)
Polcy w kupnicach su prózdne, desinfekciske srědki wupředate, wšudźe so wulki strach šěri. Na tym wina je corona-wirus. Mnichowčanka spyta tule njewěstosć za sebje wužić a poskića na Facebooku titu bionudlow a blešu z desinfekciskim srědkom za „blido na oktoberskim swjedźenju“. Hač drje tónle poskitk něchtó přiwozmje, je dwělomne.
Dźiwadźelnik Florian Bartholomäi zwaži so kónc měrca na 200 kilometrow dołhe pućowanje po afriskej Saharje. Na swój dyrdomdej so pilnje přihotuje, připasajo sej za to 15 přidatnych kilogramow na chribjet, z kotrymiž po lěsach chodźi. Přećelka je jemu tež yoga w ćopłej rumnosći doporučiła, zo móhł so na horce temperatury zwučić. Wosebje pak wjeseli so Bartholomäi na ćišinu w pusćinje a je wćipny, što w nim wuskutkuje.
Mostytwarc wuzwoleny
Mainz (dpa/SN). Němscy katolscy biskopja wuzwolichu wčera jako mostytwarca znateho Georga Bätzinga za noweho předsydu Němskeje biskopskeje konferency, z čimž zwuraznjeja jasny signal. Limburgski biskop Bätzing so wuraznje za reformy wupraja. „Zahajichmy synodalny puć, dokelž je potrjeba něšto změnić“, 58lětny wuzběhny. Bätzing naslěduje kardinala Reinharda Marxa, kiž je gremij šěsć lět nawjedował a k wólbam hižo njenastupił.
Kak w krizy dale postupować?
Berlin (dpa/SN). Hladajo na dalše rozpřestrěće corona-wirusa schadźowachu so dźensa w Berlinje strowotni ministrojo wšěch zwjazkowych krajow Němskeje, zo bychu wo dalšim postupowanju wuradźowali. Po zetkanju chcyše zwjazkowy strowotny minister Jens Spahn (CDU) wo aktualnym połoženju a krizowym managemenće informować. W Sakskej je dotal jenički pad we wokrjesu Sakska Šwica-wuchodne Rudne horiny znaty. Dalše wuslědki přepytowanjow maja dźensa w běhu dnja předležeć. Wulki dźěl ludźi, kotřiž mějachu kontakt ze 67lětnym inficěrowanym, njeje so natyknył.
Maja přemało personala
