Mjez awtotwarcami, kotřiž na lětušej 86. mjezynarodnej ...
Z nuzowym planom ćěkancam pomhać
Chce wotewrjene prašenja wujasnić
Budyšin (AW/SN). Z wčerawšim zetkanjom ze zapósłanču w Sakskim krajnym sejmje Franzisku Schubert (Zeleni) w Budyšinje je iniciatiwa Serbski sejm swoje rozmołwy z politikarjemi dale wjedła. Tak informowaše pod nawodom swojeho rěčnika dr. Měrćina Wałdy zapósłanču mjez druhim wo dotalnym stawje podpismoweje akcije, kotraž podpěruje žadanje, zahajić zakonske zakłady, zo hodźało so demokratisce legitimowane ludowe zastupnistwo Serbow wutworić. Dale zhoni Franziska Schubert wo njedawnym załoženju towarstwa Smy z. t., kotrež ma iniciatiwje prawnisce poboku być.
Dwaj dobyćerjej
Znowa dźe wo zakaz NPD
Poprawom rěči wšo za to, je pak tež wobmyslenjow
Karlsruhe/Drježdźany (dpa/K/SN). Po prěnim pospyće, zakazać prawicarsko-ekstremistisku stronu NPD před 13 lětami, zwrěšćenym zaplećenych „V-mužow“ wustawoškita do nawodnistwa strony dla, du tuchwilu dalšu kročel do tohole směra. Na próstwu Zwjazkoweje rady wo zakaz NPD jeje zmysłoweho přiwuznistwa z nacionalsocializmom dla, kotrejž běštej so zwjazkowe knježerstwo a zwjazkowy sejm přidružiłoj, Zwjazkowe wustawowe sudnistwo tuchwilu pruwuje, hač a w kotrej měrje NPD kriterije přećiwowustawnosće spjelnja. Wusud wočakuja hakle za někotre měsacy.
Tuchwilny prezident Zwjazkoweje rady Stanisław Tilich (CDU) je próstwu wo zakaz NPD hišće jónu wopodstatnił, pokazujo na jeje antidemokratiski charakter. „NPD je politisce wuznamna, a wona je strašna“, zwurazni sakski ministerski prezident wčera na jednanju Zwjazkoweho wustawoweho sudnistwa w Karlsruhe. Strona pěstuje ideologiski a radikalny rasizm. Nimo toho so na to zaměrja, rozbić europski měrowy porjad.
Ministerka so z pomocnikami ćěkancow zetkała
Sakska ministerka za integraciju Petra Köpping (SPD) bě wčera wječor z hosćom w domje za požadarjow azyla, Budyskim Sprjewinym hotelu. Tam wobhoni so wo problemach ćěkancow.
Budyšin (CS/SN). K rozmołwnym partneram ministerki słušachu wčera w prěnim rjedźe čłonojo zjednoćenstwa „Budyšin wostanje pisany“, kotrež so za ćěkancow angažuje. Ze samsneje přičiny běchu njedawno towarstwo „Witajće do Budyšina“ załožili, kotrež ma 24 čłonow. Wšitcy z nich skutkuja jako kmótřa ćěkancow. Tola, kaž aktiwisća sami posudźuja, docpěwaja woni při tym dale a bóle swoje hranicy. Na jednym boku maja přemało ludźi, na tamnym boku je nawal dźěła hoberski, za čož wjele swobodneho časa wopruja. Pobrachowace rumnosće a njedosahace fachowe kaž tež pedagogiske kmanosće čłonow dźěło tohorunja poćežuja.
Petra Köpping pokaza zrozumjenje za problemy pomocnikow. Zdobom so jim za njesebične dźěło dźakowaše. Tež wobstejnosće w hotelu su w njej přewšo dobry zaćišć zawostajili, kaž dobrowólnikam wobkrući.
To a tamne (02.03.16)
Z pónoju w ruce je 64lětna žona w Bremenje dweju rubježnikow wuhnała. Mužej běštaj so jej njedaloko nakupowanskeho centruma do puća stupiłoj. Jedyn z njeju spyta jej ručnu tobołu wutorhnyć. Na to so rezolutna žona z runje kupjenej pónoju do njeju da. Ze stracha so něhdźe 30lětnaj spěšnje zminyštaj.
Wopačneje kompjuteroweje tasty dla je chorobna kasa AOK w sewjerorynsko-westfalskim Sprockhövelu rentnarja za zemrěteho deklarowała. To měješe sćěhi: Po tym zo bě AOK měšćanske zarjadnistwo a rentowu kasu awtomatisce informowała, dósta pozdatna wudowa sobužarowanski list města. A rentowa kasa zdźěli, zo rentu wjace njepřepokaza. Mjeztym je so rěčnik AOK hišće dosć čiłemu rentnarjej z kwětkami za „čłowjeske misnjenje sobudźěłaćerja“ zamołwił.
Łužica (02.03.16)
Ličba njeskutkow so podwojiła
Podstupim (dpa/ch/SN). Ličba prawicarskich njeskutkow w Braniborskej je po wozjewjenju towarstwa Perspektiwa woporow najwyši niwow po 15 lětach docpěła. Loni zliči towarstwo 203 prawicarskoekstremistiske nadpady přećiwo ludźom a zarjadnišćam w kraju. Porno lětu 2014 bě to 120 procentow wjace. Tehdy běchu 92 nadpadow registrowali, kaž towarstwo wčera zdźěli. Statistika Perspektiwy woporow rozeznawa so wot oficialnych zarjadniskich ličbow, kotrež nutřkowne ministerstwo kóždolětnje wozjewja. Kóždy potrjecheny wšak njeskutki njewozjewi. Najwjace prawicarskich nadpadow je so loni w Choćebuzu (28) a we wokrjesu Sprjewja-Nysa (29) stało.
Ludźi wróćo wabić
Wo ćěkancach wěcownje rěčeć
Berlin (B/SN). „Alianca za swětowu wotewrjenosć, solidaritu, demokratiju a prawniski stat“ je zwjazk organizacijow a zhromadźenstwow nabožinow, sporta, kultury a hospodarstwa. K tomu słušatej tež wobě wulkej němskej cyrkwi. Tale alianca žada sej wěcownu debatu wo přijimanju ćěkancow: „Namołwjamy wšitkich, wěcownje wo ćěkancach a zapućowarjach rěčeć, zo bychmy migrantsku krizu rozrisać móhli“, piše alianca.
Pytaja kwartěry za zjězd
Lipsk (B/SN). Hosćo stoteho zjězda katolikow wot 25. do 29. meje w Lipsku maja tež we „łožach protestantow“ wotpočnyć móc. Ewangelsko-lutherski superintendent města Martin Henker podpěruje pytanje 4 000 priwatnych kwartěrow. Dosaha jednore łožo abo konopej, najlěpje kombinowane z małej snědanju. „My smy w měsće wikow zwučeni na hospodliwosć – tuž, lubi měšćenjo, zwěrće sej“, rjekny tež kulturny měšćanosta Michael Faber na zahajenju akcije „Priwatny kwartěr – hósć pyta hospodu“.
Młodźina so zaso zetka
Nadźija, ale tež zadwělowanosć
Algeriska a Marokko wopokazujetej so zwólniwej, ćěkancow wróćo wzać
Washington/Athen/Rabat (dpa/K/SN). Zo bywa pjatk wobzamknjeny přiměr w Syriskej w dalokej měrje dodźeržany, mataj ameriski wonkowny minister John Kerry a jeho němski kolega Frank-Walter Steinmeier (SPD) jako dobre znamjo nadźije za kraj, w kotrymž wobydlerska wójna howri. „Po Mnichowje su so woprawdźite postupy docpěli“, Steinmeier wobkrući. Kerry rjekny, zo budu jednotliwe pady ranjenja přiměra přepytowane.
Ministra Steinmeiera wšak šokuje, kak na hranicy mjez Grjekskej a Makedonskej přećiwo ćěkancam zachadźeja. „Wobrazy bjeze wšeho wobswědčeja, zo móže drje něchtó spytać namakać swójske narodne puće, k rozrisanju pak wone njedowjedu.“ Wón ma za to, zo dyrbja so nětko hišće bóle wo zhromadne europske rozrisanje prócować.
