Zeleni wola noweju nawodow
Ukrainski konflikt w UNO
Baerbock: Wostanjemy w Kijewje
Berlin (dpa/SN). Zwjazkowa wonkowna ministerka Annalena Baerbock je w krizy Ukrainy dla potwjerdźiła, zo wostanu sobudźěłaćerjo němskeho wulkopósłanstwa najprjedy raz w Kijewje. „Wězo tamniše wěstotne połoženje prawidłownje pruwujemy, runje tak tež połoženje na dalšich městnach swěta“, rjekny politikarka Zelenych němskim a francoskim nowinarjam. „Runja tamnym partneram EU smy so rozsudźili, ličbu sobudźěłaćerjow pósłanstwa njepomjeńšić.“ Runje nětko je wažne Ukrainu njewosłabić.
„Hdyž maja zamołwići hospodarstwa zaćišć, zo je situacija na Ukrainje cyłkownje njewěsta a njestabilna, woteběra jich zwólniwosć tam inwestować. Runje to by so Putinej lubiło. Chcemy hospodarske zhromadne dźěło z Ukrainu pohłubšić, na přikład z energijowym partnerstwom we wobłuku zeleneho wodźika“, rěkaše poselstwo Annaleny Baerbock w Kijewje. Chcyli-li swójbni sobudźěłaćerjow wulkopósłanstwa Ukrainu dobrowólnje wopušćić, móža woni to na kóšty wonkowneho ministerstwa činić.
Plahowarjo swini w Sakskej ćerpja
To a tamne (28.01.22)
Z awtom do wobchoda za kwasne šaty zrazyła je žona w Kerpenje pola Kölna. Do toho bě 69lětna při zaparkowanju před wobchodom pedalej za borzdźidło a płun zaměniła. Awto z wotmachom wotjědźe, přerazy wukładne wokno a wosta we wobchodźe stejo. Přistajena wuńdźe ze stróželemi, tež šoferka wosta njezranjena.
Ćeknjeny proch srěbacy roboter je wobydlerjow awstriskeho městačka Wieselburg zaběrał. Roboter za žiwidła wobchod rjedźi a je poprawom hotowy, hdyž so tam rano w sedmich durje wočinja. Awtomatiska kamera pak pokazowaše, kak so Fluffy přez wočinjene durje zminje. Jako mějićel wobchoda pytny, zo je „Fluffy“ preč, bě přepozdźe. Po zjawnej namołwje wobchodnika su wobydlerjo roboter we wotpadkowej firmje našli. Dźěłaćerjo běchu na chódniku stejacy nastroj sobu wzali.
Zběhnu korona-wobmjezowanja
London (dpa/SN). Najebać wulku ličbu infekcijow z koronawirusom je Jendźelska znowa nimale wšitke hišće płaćiwe wobmjezowanja zběhnyła. Wot dźensnišeho njetrjebaja ludźo w nutřkownych rumnosćach wjace nahubniki wužiwać. Na wulkozarjadowanjach a w klubach trěbny dopokaz šćěpjenja abo wustrowjenja njetrjebaja zamołwići wjace kontrolować. Poručenje, radšo doma dźěłać, tohorunja wjace njepłaći.
Na žadanje Ruskeje wotmołwili
Brüssel (dpa/SN). Po wospjetnej namołwje Moskwy su NATO a USA w konflikće Ukrainy dla na žadanja Ruskeje nastupajo wěstotne garantije w Europje wotmołwili. Pisomne stejišćo knježerstwa USA starosćow Moskwy dla je po słowach wonkowneho ministra USA Antonyja Blinkena z Ukrainu a europskimi zwjazkarjemi wotrěčane. NATO poskića Ruskej, wo polěpšenju poćahow jednać. Žadanje Ruskeje za kóncom rozšěrjenja na wuchod pak NATO wotpokazuje.
Kardinal Marx stejišćo zabrał
Tibetski hudźbnik Loten Namling nastaji so wčera na sněhakach a ze ...
Wo šćěpjenju naležnje debatowali
Berlin (dpa/SN). Wukazanje powšitkowneje winowatosće šćěpjenja přećiwo koronawirusej je w zwjazkowym sejmje dale horco diskutowana tema. W prěnjej wobšěrnej debaće wo tymle towaršnostnje brizantnym prašenju su měnjenja přiwisnikow a přećiwnikow do so zrazyli. Prominentni přiwisnicy kaž Karl Lauterbach (SPD) widźachu w tym jenički puć, pandemiju přewinyć.
Přećiwnicy, kaž wiceprezident zwjazkoweho sejma Wolfgang Kubicki a Gregor Gysi wot Lěwicy, maja šćěpjensku winowatosć za njekmanu, njepoměrnu a strašnu za dowěru ludźi do demokratije. W naležnej, ale w dalokej měrje wěcownej debaće bě jenož AfD zasadnje přećiwo winowatostnemu šćěpjenju.
Minister Lauterbach zasadźowaše so doraznje za šćěpjensku winowatosć a warnowaše před tym, naležnosć dale wotstorkować. Šćěpjenje móhło ludźi před přichodnej žołmu infekcijow w nazymje škitać, wón rjekny.
Tež přećiwnicy winowatostneho šćěpjenja, kaž Wolfgang Kubicki, wuznachu so wuraznje k šćěpjenju. „Mamy dobre argumenty za šćěpjenje. Te za winowatostne šćěpjenje pak mje njepřeswědčeja.“
Žada sej nowe formy wopominanja
Berlin (dpa/SN). Społnomócnjeny zwjazkoweho knježerstwa za bój přećiwo antisemitizmej Felix Klein žada sej nowe formy, zo by so dopominanje na złóstnistwa nacionalsocialistow zachować hodźało. „Wopominanje njesměło w formulach a ritualach sprostnyć, njesměło jenož hłowu narěčeć, ale tež wutrobu a začuća“, rjekny Klein powěsćerni dpa. Empatija je rozsudna „w časach přiběracych hrubosćow a relatiwizacije holocausta“. Raznje zasudźa wón w tym zwisku antisemitizm při koronaprotestach.
Dźensa, 27. januara, dopominaja w Němskej na wuswobodźenje nacistiskeho zaničowanskeho lěhwa Auschwitz 1945 a na wopory nacionalsocialistow. Mjez nimi běchu Židźa, Sintojo a Romojo, homoseksualni a politiscy přećiwnicy nacistiskeho režima. W zwjazkowym sejmje su ze swjatočnosću wopory nacionalsocializma wopominali. Tam rěčeštaj Inge Auerbacher, kotraž bě holocaust přežiwiła, a prezident israelskeho parlamenta Mickey Levy. Tež w dalšich městach su na wopory holocausta spominali.
Diferency mjez Kijewom a USA
Denys Trubeckoj rozprawja za Serbske Nowiny z ukrainskeje stolicy
Kijew. Sekretar ukrainskeje wěstotneje rady Oleksij Danilow je tele dny rjekł, zo njewidźi najebać koncentraciju ruskich wojerskich jednotkow podłu mjezy žane pokazki na to, zo planuje Ruska nadpad na Ukrainu. Porno tomu su USA a Wulka Britaniska ze swojim rozsudom, napjateho połoženja dla dźěl personala swojeju wulkopósłanstwow wotćahnyć, w Kijewje hněw zbudźili. Oleg Nikolenko, rěčnik ukrainskeho wonkowneho ministerstwa, mjenowaše rozsud „přechwatany. Wěstotne połoženje njeje so zasadnje změniło. Strach noweje žołmy ruskeje agresije wobsteji wot lěta 2014, a koncentracija ruskich jednotkow traje wot apryla 2021.“
